बर्दियाको खैरापुरबाट २० लाख बराबरका भन्सार छलीका सामान सहित दुई जना पक्राउ

अपराध

Home
अपराध
बर्दियाको खैरापुरबाट २० लाख बराबरका भन्सार छलीका सामान सहित दुई जना पक्राउ

बर्दियाको खैरापुरबाट २० लाख बराबरका भन्सार छलीका सामान सहित दुई जना पक्राउ

अनोज थारू, गुलरिया । बर्दिया प्रहरीले ठुलो परिमाणका अवैध मालसामान पक्राउ गर्न सफल भएको छ ।

बर्दिया प्रहरीले भन्सार छलेर ल्याएका २० लाख बराबरका अवैध मालसामान सहित २ जनालाई पक्राउ गरेको छ । पक्राउ पर्नेमा मधुवन नगरपालिका वडा नं. ८ बस्ने वर्ष २८ को हरि चौधरी र वर्ष २७ को मुकेश चौधरी रहेका छन् ।

तस्बिर स्रोत : जिल्ला प्रहरी कार्यालय बर्दिया

जिल्ला प्रहरी कार्यालय बर्दियाका प्रमुख प्रहरी उपरीक्षक (एसपी) सुधिर राज शाहीले दिनुभएको जानकारी अनुसार मिति २०७९।११।१७ गते बिहान ०३:०० बजेको समयमा भे १ च ३४०१ नं.को गाडीमा अवैध माल सामान लोड गरी भारतबाट भन्सार छली चोरी पैठारी गरिरहेको भन्ने गोप्य सूचनाको आधारमा अवैध मालसामान सहित उनीहरूलाई पक्राउ गरिएको हो ।

गुलरिया नगरपालिका वडा नं. १ खैरापुर स्थित भित्री ग्राभेल बाटोमा भारतको सिमानाकाबाट खैरापुर तर्फ ल्याउँदै गरेको अवस्थामा चेकजाँच गर्दा विभिन्न किसिमका अवैध मालसामानहरू (कपडाहरू, होली प्रयोजनको लागि आवश्यक सामाग्रीहरू, अबिर) गरी अन्दाजी मूल्य रु. १९,९४,६९०/- (उन्नाइस लाख चौरानब्बे हजार छ सय नब्बे) बराबरको मालसामानहरू बर्दिया प्रहरीले बरामद गर्न सफल भएको हो । अवैध मालसामान सहित पक्राउ परेकाहरु र बरामद गाडी आवश्यक कारबाहीका लागि राजापुर भन्सार कार्यालय गुलरिया बर्दियामा बुझाइएको जिल्ला प्रहरी कार्यालय बर्दियाका प्रमुख प्रहरी उपरीक्षक शाहीले बताउनुभयो ।