काठमाडौँ । नेपाली कांग्रेसले वैशाख ३० गते हुने स्थानीय तहको निर्वाचनमा अधिकांश स्थानमा सत्ता गठबन्धनमा रहेका राजनीतिक दलहरूबीच तालमेल भएको बताएको छ ।
पार्टी प्रवक्ता प्रकाशशरण महतले आइतबार केन्द्रीय कार्यालय सानेपामा पत्रकार सम्मेलन गर्दै केही स्थानबाहेक प्राय सबै ठाउँमा चुनावी तालमेल भएको दाबी गर्नुभएको हो ।
केही ठाउँमा अझै मिलाउने प्रयास भइरहेको जिकिर गर्दै महतले गठबन्धनको भावना र निर्णयअनुसार अघि बढ्न आग्रह गर्नुभएको छ ।
नेपाली नागरिकले झन्डै सात दशकको अनवरत संघर्षले ल्याएको लोकतन्त्र, गणतन्त्र र संविधानसभाबाट जारी गरिएको संघीयता, समावेशिता र गणतन्त्रसहितको लोकतान्त्रिक संविधानको रक्षाका लागि सत्तामा गठबनधनमा रहेका दलहरूबीच तालमेल गर्ने निर्णय भएको पनि कांग्रेस प्रवक्ताद्वारा जारी विज्ञप्तिमा उल्लेख छ ।
देशभरका ७ सय ५३ स्थानीय तहका लागि ३५ हजार २ सय २१ पदमा हुने निर्वाचनमा सत्तारुढ गठबन्धनका तर्फबाट प्रायःसबै पदमा उम्मेद्वारी परेको छ जनाउँदै कांग्रेसले तालमेल नभएको कतिपय स्थानमा पूर्व सहमति अनुसार नै गठबन्धनका दलहरूबीच मित्रवत प्रतिस्पर्धा हुने जनाएको छ ।
पार्टी निर्णयविपरीत स्वतन्त्र उम्मेदवारी कायम राख्ने नेता तथा कार्यकर्तालाई विधानको व्यवस्था अनुसार साधारण सदस्यतासमेत नरहनेगरी कारवाही हुने कांग्रेसले जनाएको छ ।
तर प्राविधिक कारणले र तालमेलको निर्णय ढिलो भएको कारणले फिर्ता लिन नभ्याउनुभएका निर्णय शिरोधार्य गरी पार्टी र गठबन्धनका आधिकारिक उम्मेद्वारहरूको पक्षमा समर्थन गर्दै वक्तव्य जारी गरी चुनावी प्रतिस्पर्धाबाट बाहिरिनेलाई भने पार्टी विधानको उक्त प्रवाधान लागु नहुने उल्लेख गरिएको छ ।
स्थानीय तहको निर्वाचनलाई प्रभावकारी बनाउँदै आफ्नो पक्षमा परिणाम ल्याउन पार्टीका सबै तह तथा भ्रातृ र शुभेचछुक संगठन परिचालित भएको कांग्रेसले दाबी गरेको छ । निर्वाचन अभियानलाई मर्यादित,अनुशासित र सुव्यवस्थित ढंगले सञ्चालन गर्न उपसभापति पूर्णबहादुर खड्काको संयोजकत्वमा गठित समितिले काम गरिहेको कांग्रेसले जनाएको छ ।
महामन्त्री गगन थापाको संयोजकत्वमा गठित घोषणा–पत्र तयारी समितिले स्थानीय तहलाई अधिकार सम्पन्न, सक्षम, सवल, उत्तरदायी, नागरिकमुखी सेवाप्रवाह गर्न सक्ने बनाउन संकल्प गरेको दोहोर्याएको छ । अर्का उपसभापति धनराज गुरुङ्को संयोजकत्वमा देशव्यापी कार्यक्रम समन्वय उपसमिति गठन भएको भन्दै कांग्रेसले स्थानीय निर्वाचनलाई अत्यन्त मर्यादित, संयमित र अनुशासित ढंगले सञ्चालन गरिरहेको दाबी गरेको छ ।
प्रतिस्पर्धी राजनीतिक दलका नेताले आचारसंहिताको धज्जी उडाउँदा समेत निर्वाचन आयोग मौन रहेको भन्दै कांग्रेसले असन्तुष्टि पनि जनाएको छ ।
३१ हजार २ सय ५१ जना पार्टीका नेता तथा कार्यकर्ताले विभिन्न तहमा उम्मेदवारी दिएको जनाउँदै कांग्रेसले ६ सय २३ जनाले उम्मेदवारी फिर्ता लिँदा ३० हजार ६ सय २८ जनाको कायम रहेको उल्लेख गरेको छ ।
तीमध्ये प्रमुखमा २ सय ६२ जना र अध्यक्षमा ३ सय ७२ जनाको उम्मेदवारी रहेको कांग्रेसले जनाएको छ । उपप्रमुखमा १ सय ९४ र उपाध्यक्षमा ३ सय४० जनाले पार्टीको तर्फबाट उम्मेदवारी दिएको जनाइएको छ ।
