नेपालगञ्जमा सञ्चालन गर्न लागिएको छात्रा कलेजका लागि सञ्चालक समिति गठन

शिक्षा

Home
शिक्षा
नेपालगञ्जमा सञ्चालन गर्न लागिएको छात्रा कलेजका लागि सञ्चालक समिति गठन

नेपालगञ्जमा सञ्चालन गर्न लागिएको छात्रा कलेजका लागि सञ्चालक समिति गठन

नेपालगञ्ज । नेपालगञ्जमा सञ्चालन गर्न लागिएको छात्रा कलेज सञ्चालनका लागि सञ्चालक समिति गठन गरिएको छ ।

नेपालगञ्ज उपमहानगरपालिकामा आज आयोजित कार्यक्रममा नगर प्रमुख डा. धवलशम्शेर राणा र उपप्रमुख उमा थापा मगरले सञ्चालक समितिका अध्यक्ष विजय गुप्ता लगायत समितिका पदाधिकारी र सल्लाहकार समितिका सदस्यहरुलाई औपचारिक पत्र हस्तान्तरण गर्नुभयो । सो अवसरमा नगर प्रमुख राणाले महिला कलेज सञ्चालनका लागि भवन निर्माण कार्य अन्तिम चरणमा पुगेको जानकारी दिँदै उपमहानगरपालिकाको परियोजना भएपनि यसको सञ्चालन उपमहानगरपालिकाको प्रत्यक्ष नियन्त्रण भन्दा स्वायत्त होस भन्ने चाहना आफुहरुको रहेको बताउनुभयो ।

उपप्रमुख थापा मगरले समाजमा पछाडि परेका समुदायका छात्राहरुलाई उच्च शिक्षामा प्रवेशका लागि कलेज सञ्चालन गर्न लागिएको राजनीतिक प्रभाव विना निष्पक्ष भएर काम गर्न आग्रह गर्नुभयो । नेपालगञ्ज उपमहानगरपालिकाले मंगलप्रसाद उच्च माविमा कलेज स्थापनाका लागि ४० कोठे भवन तयार पारेको छ । यस वर्ष बिएससी सिएसआइटी र विएड कक्षा सञ्चालन अनुमतिका केही दिनमै प्रस्तावनापत्र मध्यपश्चिम विश्वविद्यालयमा पेश गरिने नेपालगञ्ज उपमहानगरपालिका शिक्षा महाशाखा प्रमुख गोर्ख वहादुर थापाले बताउनुभयो ।

नेपालगञ्जमा रहेका मधेसी र मुस्लिम समुदायका छात्राहरुका लागि मुख्य लक्षित गरी कलेज स्थापना गर्न लागिएको हो । मधेसी आयोगका सदस्य गुप्ता अध्यक्ष रहेको ११ सदस्यीय सञ्चालक समितिको सदस्यहरुमा रविन्द्र कर्ण, अनिता शाह, मैमूना सिद्धिकी, नमस्कार शाह, कौसलकुमार धोवी, मो. खालिद इकवाल ईराकी, चन्द्रशेखर पाण्डे, दिपाली टण्डन गुप्ता रहनुभएको छ । समितिको सदस्य सचिव क्याम्पस प्रमुख र शिक्षा महाशाखाबाट पनि समितिमा प्रतिनिधित्व हुनेछ । यसैगरी नगर प्रमुख डा. धवल शम्शेर राणाको संयोजकत्वमा डा. एम किदवाई, डा. कौशलकुमार वर्मा, परवेज अली सिद्धिकी र शशी स्वाँर रहेको सल्लाहकार समिति गठन गरिएको छ । उपप्रमुख थापा मगरको संयोजकत्वमा अनुगमन समिति गठन भएको छ ।

प्रकाशित मिति: आइतबार, साउन ३१, २०७८ ०८:४०

प्रतिक्रिया दिनुहोस्