बर्दिया । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) निकट अखिल राष्ट्रिय स्वतन्त्र विद्यार्थी युनियन (अखिल क्रान्तिकारी) बर्दियाले गुलरिया नगरपालिका र बढैयाताल गाउँपालिका, निजी तथा आवासीय विद्यालय अर्गनाइजेसन (प्याब्सन), राष्ट्रिय निजी तथा आवासीय विद्यालय एसोसियसन नेपाल (एनप्याब्सन)लाई ज्ञापनपत्र बुझाएको छ । अखिल क्रान्तिकारी बर्दियाले १९ बुँदे ज्ञापनपत्र बुझाएको हो ।
लकडाउनका कारण आम जनतालाई हातमुख जोर्न समेत मुस्किल बन्दै गइरहेको अवस्थामा विभिन्न विद्यालयहरुले अनलाइन कक्षाका नाममा तथा सामुदायिक विद्यालयहरुले अङ्ग्रेजी माध्यमका नाममा चर्को शुल्क असुलिरहेको भन्दै शुल्क असुली रोक्न माग गर्दै ज्ञापनपत्र बुझाएको हो ।
सरकारी विद्यालयहरुमा नेपाली र अङ्ग्रेजी माध्यमका नाममा गरिएको विभेदको अन्त्य गरिनुपर्ने, भौतिक रूपमा कक्षा सञ्चालन नभएको अवधिको शुल्क छुट गरिनुपर्ने, निजि विद्यालयद्वारा गरिएको पाठ्यपुस्तक र पोशाकको व्यापार बन्द गरिनुपर्ने, नेपालको चुच्चे नक्सा पाठ्यक्रममा समावेश गरिनुपर्ने, शिक्षक कर्मचारी माथिको बौद्धिक शोषणको अन्त्य गरिनुपर्ने लगायतका माग राख्दै ज्ञापनपत्र बुझाईएको हो ।
ज्ञापनपत्र बुझाउँदै अखिल (क्रान्तिकारी) बर्दियाका अध्यक्ष हरि प्याकुरेलले कोरोनाका कारण दैनिक जिवनयापन समेत गाह्राे परिरहेको बेला केही निजि र सामुदायिक विद्यालयहरुले लुट मच्चाईरहेको भन्दै अविलम्ब रोक्न माग गर्नुभएको छ ।
मागलाई कार्यन्वन नगरे कारवाही गर्ने चेतावनी दिनुभएको छ । बढैयाताल गाउँपालिकाका प्रमुख प्रशासकीय अधिकृत अर्जुन सुवेदी, गुलरिया नगरपालिका नगर शिक्षा प्रमुख निलकण्ठ रेग्मीले मागहरू जायज भएकाले तत्काल कार्यान्वयन गर्ने प्रतिबद्धता गर्नु भएको छ ।
बर्दिया प्याब्सनका अध्यक्ष तेजनाथ पौडेलले अनलाइन शिक्षाको नाममा कसैले विद्यार्थीको उपस्थिती बिना शुल्क लिएको छ भने कारबाही गर्ने बताउनु भयो ।
एनप्याब्सनका अध्यक्ष बुद्ध गिरिले निजि शिक्षा भित्र देखिएका चरम लापरबाहीलाई नियन्त्रण गर्ने र अखिल क्रान्तिकारीसंग सहकार्य गरेर मापदण्ड बिपरित काम गरेका बोर्डिङ स्कुलहरुमा अनुगमन गर्ने बताउनु भयो ।
कार्यक्रममा अखिल क्रान्तिकारी बर्दिया जिल्ला इन्चार्ज लोकेश जोशी, अध्यक्ष हरि प्याकुरेल लगायतको सहभागिता थियो ।
