डाइमण्ड बोर्डिङ स्कुल गंगापुरले सरस्वती पूजा धूमधामले मनायो

शिक्षा

Home
शिक्षा
डाइमण्ड बोर्डिङ स्कुल गंगापुरले सरस्वती पूजा धूमधामले मनायो

डाइमण्ड बोर्डिङ स्कुल गंगापुरले सरस्वती पूजा धूमधामले मनायो

रबिन्द्र यादव, नवलपरासी पश्चिम । प्रत्येक वर्ष माघ शुक्ल पञ्चमीका दिन मनाइने श्री पञ्चमी विद्याकी देवी सरस्वतीको पूजा आराधना गरी आज देशभर मनाइएको छ । वसन्त पञ्चमीका दिन सरस्वतीको पूजा गरे विद्या बुद्धि बढ्ने जन विश्वास छ । देशभरका सरस्वती मन्दिरमा पूजा आराधना गर्न श्रद्धालुको भीड लागेको छ ।

विद्यालय नपठाइएका साना बालबालिकालाई आजकै दिनदेखि अक्षरारम्भ गराउने चलन छ । आजका दिन लेखपढ गर्न सिकाए राम्रो विद्या आउने जनविश्वास रही आएको छ । ज्ञान, बुद्धि र विवेक प्राप्तिका लागि विद्याकी देवीका रूपमा सरस्वतीको पूजाआजा गरिन्छ ।

यसै क्रममा प्रतापपुर गाउँपालिका-८ गंगापुर स्थित डाइमण्ड इङ्लिस बोर्डिङ स्कुलले विद्याकी देवी सरस्वतीको पूजा अर्चना गरेर श्री पञ्चमी मनाएको छ । विद्यालयले देवी सरस्वतीको पूजा अर्चना एवं मूर्ति प्राण प्रतिष्ठा गरी सरस्वती पूजा मनाएको हो ।

देवी सरस्वतीको मूर्ति प्राण प्रतिष्ठा विद्यालयका सञ्चालक प्रमुख मनोज कुमार पालले गर्नुभएको थियो । त्यसै गरी सरस्वती पूजा अवसरमा १२ जना विद्यार्थी भर्ना गरी अक्षरारम्भ गराइएको विद्यालयका प्रधानाध्यापक सरिता ठाकुरले जानकारी दिइन । सरस्वती पूजाकै दिन बालबालिकाहरूले शिक्षारम्भ गर्ने प्रचलन छ ।

विद्यालयले गत वर्षको परीक्षामा उत्कृष्ट अङ्क ल्याई पास भएका नर्सरी देखि कक्षा ६ सम्मका बालबालिकालाई विद्यालयका प्रअ ठाकुरले कलम कापी वितरण गर्नुभएको थियो भने स साना बालबालिकाले सांस्कृतिक कार्यक्रम मार्फत आ- आफ्ना कला समेत प्रस्तुत गरेको विद्यालयका शिक्षक शीत वसन्त यादवले बताए । अहिले उक्त बोर्डिङ स्कुलमा ३ सय ६५ जना बालबालिका अध्ययनरत छन् ।