बर्दिया बढैयाताल वडा नं ३ का वडाअध्यक्ष बलात्कार गरेर फरार, प्रहरीले ब्यापक खोजतलास गर्दै
बर्दिया । बर्दियाको बढैयाताल गाउँपालिका वडा नं ३ का वडाअध्यक्ष लल्लन यादवले एक महिलामाथि जबरजस्ती करणी (बलात्कार) गरेको आरोप लागेको छ । बलात्कार आरोपमा प्रहरीमा जाहेरी परेपछि वडाअध्यक्ष लल्लन यादव फरार भएका छन ।
वडाअध्यक्ष यादवलाई एक महिला (संकेत नम्बर ९ क)ले जबरजस्ती करणी गरेको भन्दै यही भदौ १७ गते शुक्रबार साँझ करिव ४ बजेतिर ईलाका प्रहरी कार्यालय मैनापोखरमा उजुरी दर्ता गराउनुभएको छ ।
जाहेरी दर्ता भएपछि आरोपित वडाअध्यक्ष यादव अहिले फरार रहेका छन भने बर्दिया प्रहरीले उनको ब्यापक खोजी कार्य जारी राखेको छ । ईलाका प्रहरी कार्यालय मैनापोखरले विशेष टोली नै खटाएर वडाअध्यक्ष यादवको खोजी कार्य तीब्र बनाएको छ ।
ईलाका प्रहरी कार्यालय मैनापोखरको प्रमुखको रूपमा जिम्मेवारी सम्हालेको १५ दिन भित्र चोरी तथा डाँकामा संलग्न तथा लागूऔषध कारोबारीहरूलाई पक्राउ गरेर मातहतका क्षेत्रमा शान्ति सुव्यवस्था कायम गर्न सफल हुनुभएका प्रहरी निरीक्षक (इन्स्पेक्टर) कमल क्षत्री आफै यो घटनाको अनुसन्धानलाई लिड गर्दै वडाअध्यक्ष यादवलाई पक्राउ गर्न फिल्डमै उत्रिनुभएको छ ।
ईलाका प्रहरी कार्यालय मैनापोखरका प्रमुख प्रहरी निरीक्षक (इन्स्पेक्टर) कमल क्षत्रीले नेपाल कागजसँग भन्नुभयो, "पीडित महिलाले हामी कहाँ उजुरी दिएपछि प्रहरी परिचालन गरेर वडा अध्यक्ष यादवलाई तिव्र रुपमा खोजी कार्य जारी राखेका छौँ । पीडितलाई न्याय दिलाउन कुनै कसर हामीबाट बाँकी रहने छैन । अनुसन्धान अत्यन्तै संवेदनशिलताका साथ अगाडी बढाएका छौँ । आरोपी वडाअध्यक्षलाई कानुनको दायरामा ल्याएर पीडितलाई न्याय दिलाउन बर्दिया प्रहरी कटिवद्ध भएर लागेको छ ।"
पीडित महिला (संकेत नम्बर ९ क)को मेडिकल स्वास्थ्य चेकजाँच गराएर जिल्ला प्रहरी कार्यालय बर्दियामा पठाएको प्रहरी निरीक्षक क्षत्रीले बताउनुभयो ।
निरीक्षक (इन्स्पेक्टर) कमल क्षत्रीले अगाडि भन्नुभयो, "पीडित महिलाको अझै मेडिकल रिर्पोट आउन बाँकी छ । उहाँ अहिले प्रहरी संरक्षणमा रहनु भएको छ ।"
यस विषयमा जिल्ला प्रहरी कार्यालय बर्दियाका प्रमुख प्रहरी उपरीक्षक (एसपी) बिरेन्द्र बहादुर शाहीले नेपाल कागजलाई प्रतिकृया दिँदै भन्नुभयो, "जबरजस्ती करणी अभियोगमा प्रहरी कार्यालयमा जाहेरी आएपछि प्रहरीले प्राथमिकतामा राखेर अनुसन्धान अगाडि बढाएको छ । पिडित महिला प्रहरीको संरक्षणमा हुनुहुन्छ । उहाँलाई काउन्सिलिङ (मनोपरामर्श) दिने देखी लिएर सम्पूर्ण कानुनबाट निर्देशित सुविधा उपलब्ध गराउँदै हामीले आफ्नो संरक्षणमा राखेका छौँ । उहाँलाई न्याय दिलाउन बर्दिया प्रहरी अत्यन्तै गहिरो र सूक्ष्म ढंगले अनुसन्धान गरिरहेको छ । आरोपी वडाअध्यक्ष यादवको खोजी कार्यमा प्रहरीका विशेष टोलीहरू परिचालित छन ।"
(महिलाको गोपनियताको रक्षार्थ हेतु पत्रकार आचार संहिता अनुसार नेपाल कागजले प्रयोग गरेको संकेत नम्बर ९ क, प्रहरीले प्रयोग गरेको संकेत नम्बर फरक हुनसक्छ ।) सहसम्पादक
