बर्दिया । बर्दियाको बाँसगढी नगरपालिकाले नगरमा हुने कार्यक्रमहरूमा प्लाष्टिकजन्य वस्तुको प्रयोगमा रोक लगाएको छ ।
बाँसगढी नगरपालिकाका नगरप्रमुख (मेयर) खड्क बहादुर खड्काले उद्योगी व्यापारी, बैंक तथा वित्तिय संस्था लगायत सम्पूर्ण प्रवासीहरूलाई सम्बोधन गर्दै जारी गरेको सूचनामा नगरभित्र गरिने कार्यक्रमहरूमा प्लाष्टिकजन्य वस्तुको प्रयोग नगर्न निर्देशन दिइएको छ ।
उद्योगी व्यापारी, बैंक तथा वित्तिय संस्था लगायत सम्पूर्ण नगरवासीहरूमा सम्बोधन गर्दै सूचनामा लेखिएको छ, "नगरपालिका अन्तर्गतका सबै कार्यालय निकायहरूले आयोजना गर्ने विभिन्न सभा, समारोह, गोष्ठी, सेमिनार आदिमा अतिथि सत्कारका लागि प्रयोग गरिँदै आएको खादा, प्लास्टिकजन्य झोला, प्लास्टिकजन्य माला आदिलाई निरुत्साहित गर्नआवश्यक भएको सन्दर्भमा लुम्बिनी प्रदेश सरकार तथा यस नगरपालिकाको आर्थिक बर्ष २०७९।०८० को नीति तथा कार्यक्रममा समेत प्लाष्टिकजन्य झोला, माला तथा खादाको प्रयोगलाई निरुत्साहित गर्ने भन्ने उल्लेख भए बमोजिम अब उप्रान्त देखि प्लाष्टिकजन्य झोला, प्लाष्टिकजन्य माला तथा खादाको प्रयोग नगर्ने तथा नगराउने कार्य गर्नुहुन सम्बन्धित सबैलाई जानकारीका लागि यो सूचना प्रकाशन गरिएको छ ।"
यस विषयमा थप प्रष्ट पार्दै बाँसगढी नगरपालिकाका नगरप्रमुख खड्क बहादुर खड्काले नेपाल कागजसँग भन्नुभयो, "पहिलो चरणमा नगरभित्र हुने कार्यक्रममा प्लास्टिकजन्य वस्तुको प्रयोगलाई निरुत्साहित गर्छौँ र दोस्रो चरणमा नगरभित्रका पसल तथा स्थानीय स्तरमा प्रयोग हुँदै आएको प्लास्टिक प्रयोगलाई समेत निरुत्साहित गर्छौ ।"
प्लाष्टिकका झोला, गिलास तथा अन्य प्लाष्टिकजन्य बस्तुहरू प्रयोग गरी जताजतै फाल्दा ठाँउठाँउमा फोहोर देखिनुका साथै वातावरण प्रदुषण हुने र फोहोर व्यवस्थापनमा समेत समस्या हुँदै आएकाले नगरपालिकाको यो कदमलाई सकारात्मक रुपमा लिइएको छ ।
