बर्दिया । बर्दिया प्रहरीले ग्याङ्ग(समूह)मा आएर राती कुटपिट गरि फरार भएका एक युवकलाई पक्राउ गरेको छ ।
मिति २०७८।११।०६ गते राती करिब ११:३० बजेको समयमा १० देखि १२ जनाको ग्याङ्ग(समूह)मा आएका ब्यक्तिहरुले बर्दियाको बढैयाताल गाउँपालिका वडा नं- ६ मैनापोखरमा महेन्द्र सुनार र कृष्ण बि.क.लाई कुटपिट गरि फरार भएका थिए ।
उक्त सामुहिक कुटपिट घटनामा संलग्न बाँकेको बैजनाथ गाउँपालिका वडा नं-६ बस्ने सुन्दरमान बिश्वकर्मालाई ईलाका प्रहरी कार्यालय मैनापोखरबाट खटिएको प्रहरी टोलीले बर्दियाको बढैयाताल गाउँपालिका वडा नं- ४ उत्तर भकारीबाट नियन्त्रणमा लिएको जिल्ला प्रहरी कार्यालयका निमित्त कार्यालय प्रमुख प्रहरी नायव उपरीक्षक (डिएसपी) हेम बहादुर शाहिले जानकारी दिनुभयो ।
उहाँले नेपालकागजसंग फोन सम्पर्क गर्दै भन्नुभयो, "२ जना ब्यक्तिहरु घाइते हुनुभएको थियो, उहाँहरुको नेपालगन्ज मेडिकल कलेजमा उपचार भैरहेको छ । गुन्डागर्दी र दादागिरी शैलीमा कुटपिट गरेको सुचना प्राप्त भएसंगै प्रहरीले तिब्र रुपमा खोजी कार्य अघि बढाएको थियो र फरार रहेका अभियुक्तहरुको खोजी कार्य जारी छ । जिल्लाको शान्तिसुरक्षामा प्रहरी कटिबद्ध भएर लाग्दै आएको थियो र लागीरहेको छ ।"
सामुहिक कुटपिटमा बर्दियाको बढैयाताल गाउँपालिका वडा नं - ६ मैनापोखर निवासी महेन्द्र सुनार र सोही गाउँपालिका वडा नं- ८ निवासी कृष्ण बि.क घाइते हुनुभएको छ ।
घटना लगत्तै इलाका प्रहरी कार्यालय मैनापोखरबाट खटिएको प्रहरी टोलीले सामुहिक कुटपिटमा संलग्नहरुको खोजी कार्य गर्दा बाँकेका सुन्दरमान बिश्वकर्मालाई लुकिछिपी भागिरहेको अवस्थामा पक्राउ गर्न सफल भएको निमित्त कार्यालय प्रमुख शाहिले जानकारी दिनुभयो ।
पक्राउ परेका सुन्दरमान बिश्वकर्मालाई ज्यान मार्ने उद्योगमा जिल्ला अदालत बर्दियाबाट ३ दिन म्याद थप गरी थप अनुसन्धान कार्य अगाडी बढाईएको तथा सो घटनामा संलग्न अन्य व्यक्तीहरुको खोजि कार्य तिब्र रुपमा अगाडी बढाईएको निमित्त प्रमुख शाहीले बताउनुभयो ।
एक फरक प्रसंगमा नेपालकागजकर्मीले तपाईं निमित्त कार्यालय प्रमुख भएपछि प्रहरी परिचालन र गस्तिमा बढोत्तरी भएको भन्ने हाम्रो स्रोतको भनाइ छ भन्दै राखिएको प्रश्नमा निमित्त प्रमुख कार्कीले भन्नुभयो, "होइन यस अघिका एसपी साब हुँदापनी प्रहरी परिचालन, गस्ती, शान्तिसुरक्षाको सवालमा कुनै कमि थिएन र म निमित्त भएपछि अँझै सुरक्षा सतर्कता बढाइएको भन्ने कुरा नभएर प्रहरीको प्रमुखमा म भएपनी नभएपनी सँधै चुस्तदुरुस्त भएर आफ्नो कर्तव्यपालनमा जनताको सुरक्षामा बर्दिया प्रहरी लागेको छ र लागिरहेको थियो । हेम शाही आएपछि मात्र शान्तिसुरक्षामा संबेदनसिलता बढ्यो भन्ने होइन, हिँजोका दिनमा म नहुँदा र हाम्रो एसपी साब हुँदा समेत प्रहरी दत्तचित्त भएर कर्तव्य पालना उत्तिकै संबेदनसिल भएर लागेको थियो र आजपनी छ । केही चोरीका घटना बढेको भन्ने जनगुनासो आएपछि प्रहरीले त्यस्ता चोर, लुटेरालाई कानुनी दायरामा ल्याएको छ भने अहिलेपनी त्यस्ता घटनामा संलग्न हुनसक्ने आँकलन भएका ठाउँमा निगरानी बढाएको छ ।"
पछिल्लो समय बर्दिया प्रहरीले जिल्लामा उच्च सुरक्षा सतर्कता अपनाउँदै सुरक्षा गस्ती तथा बन्दोबस्ती बढएको जिल्ला प्रहरी कार्यालय बर्दियाका हाम्रा स्रोतले जानकारी दिनुभयो । स्थानीय तह निर्वाचनको मिति समेत नजिकिएकोले बर्दिया प्रहरीले शान्ति सुरक्षामा खलल पुर्याउन सक्ने समूह तथा तत्वहरुमा विशेष निगरानी बढाएको स्रोतको दाबी छ ।
