बर्दिया । बर्दियामा वन्यजन्तुको आक्रमणका घटना दिनानुदिन बढीरहेका छन । वन्यजन्तुको आक्रमणमा परि ज्यान गुमाउनेको संख्यापनी बढीरहेको छ । वन्यजन्तुको आक्रमणमा परि ज्यान गुमाएका स्थानियहरुको परीवारलाई बुधवार, कार्तिक १० गते एक कार्यक्रमका बिच राहत वितरण गरिएको छ ।
गत आर्थिक वर्षमा बर्दियाको खाता जैविक मार्ग अन्तर्गतका राष्ट्रिय वन क्षेत्रमा वन्यजन्तुको आक्रमणमा परि ७ जनाको निधन भएको थियो भने चालु आर्थिक वर्षमा २ जनाको निधन भएको छ । वन्यजन्तुको आक्रमणमापरी मृत्यु भएका ९ जनाको परिवारलाई डिभिजन वन कार्यालय बर्दियाको आयोजना तथा राष्ट्रिय प्रकृति संरक्षण कोष बर्दियाको सहयोगमा राहत स्वरुप प्रत्यक परीवारलाई ५० हजार रकम वितरण गरिएको हो ।
खाता सामुदायिक वन समन्वय समिती, मधुवन नगरपालिका वडा नं-३, खातामा भएको कार्यक्रममा पीडित परिवारहरुलाई राहत वितरण गरिएको हो । उक्त कार्यक्रममा प्रमुख अतिथिका रुपमा डिभिजन वन कार्यालय बर्दियाका डिभिजनल अधिकृत प्रवीण विडारी, विशिष्ट अतिथि मधुवन नगरपालिकाका नगर उप-प्रमुख शुवरानी थारु र राष्ट्रिय प्रकृति संरक्षण कोष बर्दियाका प्रमुख रविन कडरिया रहनुभएको थियो भने अतिथिको रुपमा राजापुर नगरपालिका वडा नम्बर १० का वडा अध्यक्ष दयाशंकर थारु, समन्वय समिति खैरीका सचिव नारायण शाही, तराई भु-परिधी कार्यक्रम (ताल)का प्रतिनिधि माया योगी रहनुभएको थियो । 
राहत वितरण कार्यक्रममा राष्ट्रिय प्रकृति संरक्षण कोष बर्दियाका प्रमुख रविन कडरियाले पीडित परिवारलाई थोरै भएपनि राहत महशुस होस् भनेर सहयोग गरिएको बताउनुभयो । उहाँले भन्नुभयो, "नहुनुपर्ने घटना भइसक्यो यस प्रति हार्दिक समवेदना प्रकट गर्द्छु । पीडित परिवारलाई एउटा सानो सहयोग होस् र घरपरिवारमा टेवा पुगोस् भनेर हामीले सहयोग गरेका हौँ । मानव-वन्यजन्तु द्वन्दका घटनामा कमी आओस भनेर हामीले उपायहरु अबलम्बन गरिरहेका छौँ ।"
कार्यक्रममा बोल्दै मधुवन नगरपालिकाका उपप्रमुख शुवरानी थारुले कुनै पनि घटना घटिसकेपछि राहत भन्ने कुरा जति धेरै भएपनि कम हुने बताउनुभयो । उहाँले भन्नुभयो, "जीवन अमुल्य छ, जीवन जाँदाको पिडाला अली काम गरौँ भन्ने उदेश्यले राहत वितरण गरिएको हो । पीडित परिवारसंग म साथमा छु ।"
उपप्रमुख थारुले अगाडि थप्नुभयो, "वन जंगलका कुरा गर्दा वन्यजन्तुको पनि कुरा गरिन्छ तर वन जंगलको क्षेत्रफल कति ? त्यस वन क्षेत्रफलमा कति वन्यजन्तु रहन्छन् ? बढि भएमा अन्यत्र स्थान्तरण गर्नुपर्छ । हामीलाई वन्यजन्तु, वन जंगल र मानव सबैलाई बचाउनु छ। मानविय क्षति नहुने गरि वन्यजन्तु व्यवस्थापन गरिदिँदा राम्रो हुन्छ ।"
त्यस्तै, डिभिजन वन कार्यालय बर्दियाका डिभिजनल अधिकृत प्रवीण विडारीले राहत एउटा सानो मल्हमपट्टी मात्रै भएको र पीडित परिवारलाई आफ्नो साथ सहयोग सदैव निरन्तर रहिरहे बताउनुभयो । नेपाल सरकारले २०६९ सालमा पीडितहरुलाई कसरी सहायता दिन सकिन्छ भनेर राहत निर्देशिका ल्याएको उहाँले बताउनुभयो ।
उहाँले भन्नुभयो, "राहत निर्देशिका परिमार्जित हुदै २०७८ संशोधन हुँदैछ । त्यस राहत निर्देशिकामा अहिले समाबेश नभएका कुरा पनि समाबेश हुन्छ । मानव र वन्यजन्तु सह-अस्तित्व स्विकार्दै अगाडि बढ्नु पर्नेमा अर्को विकल्प छैन ।"
कार्यक्रममा भनाइ राख्नेक्रममा बर्दिया राष्ट्रिय निकुञ्ज क्षेत्र भित्र कुनै जंगली वन्यजन्तुबाट मानवीय क्षति भएमा ५ लाख पाइने गरेको तर पहिला खैरीचन्दनपुर गाउँ विकास समिती हुँदा निकुञ्ज क्षेत्र भन्दा बाहिर मानवीय क्षति भएमा जम्मा २५ हजार मात्रै पाइने विभेदपुर्ण व्यवहार भएको तर अहिले चाँहि समान व्यवहार गरेकोमा आफू खुशी रहेको राजापुर नगरपालिका वडा नम्बर १० का अध्यक्ष दयाशंकर थारुले बताउनुभयो ।
राहत वितरण कार्यक्रम खाता सामुदायिक वन समन्वय समिति मधुबन नगरपालिका वडा नम्बर ३ खाता बर्दियाका अध्यक्ष बलिराम चौधरीको अध्यक्षतामा सम्पन्न भएको थियो भने कार्यक्रम संचालन खाता सब-डिभिजन वन कार्यालय सानोश्री बर्दियाका सहायक वन अधिकृत सन्तोष चौधरीले गर्नुभएको थियो ।
