तस्बिर : राहत हस्तान्तरण गर्दै मधुवन नगरपालिकाका नगर प्रमुख गणेशबहादुर के.सी(कृष्ण)
बर्दिया । मधुवन नगर क्षेत्रमा बस्ने नगरवासीहरु लामो समयदेखी वन्यजन्तुबाट पीडित छन । मानव-वन्यजन्तु न्युनिकरणका बिभिन्न उपायहरु यहाँँ कार्यरत संघ-संस्था तथा स्थानिय निकायले अबलम्बन गरिरहेका छन तरपनी मानव-वन्यजन्तु द्वन्द बढीरहेकै अवस्था रहेको छ । यहाँँका स्थानियले लगाएका बाली जनावरले नष्ट गर्ने देखी आक्रमण गर्ने सम्मका घटनाहरु भैरहेका छन । धेरै नगरवासीहरु भण्डारण गरि राखेको अन्नबालि र घर जनावरले नष्ट गरिदिनाले र चौपाया मारिदिनाले पीडित छन ।
सामान्य लाग्ने तर विकराल समस्याको रुपमा बढ्दै गएको घटनाका पीडितहरुलाई सहयोग गर्ने अभियानमा लाग्नुभएको छ मधुवन नगरपालिका नगर प्रमुख गणेशबहादुर के.सी(कृष्ण) । मधुवन नगरपालिकाका नगर प्रमुखको विशेष पहलमा अहिले नगरपालिकाले पीडितहरुलाई सहयोग अभियान संचालन गरेको छ ।
नगर प्रमुख के.सी.(कृष्ण)ले नियम बमोजिम नगरपालिकाबाट आफुले पाउने सेवा-सुबिधा नलिएर-कटौती गरेर बचाएको रकमबाट स्थानियवासिहरुलाइ सहयोग गरिरहनुभएको छ भने यो सहयोग गर्ने क्रमलाई निरन्तरता दिँदै अभियान स्वरुप अगाडि लग्नुभएको छ । उहाँको अभियान केही समययता सुरु भएपछि मानव-वन्यजन्तु द्वन्दबाट पीडित भएका स्थानिय जनता लाभान्वित भएका छन । नगरप्रमुख के.सी(कृष्ण)ले जंगली हात्तीबाट पीडित बन्न पुग्नुभएका मधुवन नगरपालिका वडा नं.-१ निवासी रेशम थारुलाई बिहिवार घरमै गएर राहत रकम उपलब्ध गराउनुभएको छ ।
जंगली हात्तीले थारुको घरमा भण्डारण गरि राखेको अन्नबालि नष्ट गर्नुका साथै घर समेत भात्काइदिएको थियो । अती विपन्न रेशम थारुको घरको भित्तानै हात्तीले भत्काइदिएपछि भित्ता बिनाको घरमा थारुको परीवार सुत्न वाध्य हुनुभएको छ । थारुले राहत स्वरुप सहयोग रकम नगर प्रमुख केसी बाट बुझ्दै एक वाक्य मात्र भन्नुभयो, "अब म घरको भित्ता बनाउँछु र परिवारलाई सुरक्षित राख्छु ।"
तस्बिर : हात्तीले भत्काएको रेशम थारुको घर
थारुको घरमा भण्डारण गरि राखेको चामल, धान, गहुँ र तोरी लगायतका अन्नबालि गेरुवा कर्णाली सामुदायिक वनबाट आएको जंगली हात्तीले नष्ट गरेको थियो । मधुवन नगरपालिका वडा नं.-१ का वडा अध्यक्ष प्रशुराम चौधरी र प्रहरीले गरेको मुल्यांकन अनुसार थारुको करिब ५० हजार रुपैयाँ बराबरको धन सम्पत्तिको क्षति भएको छ । आफ्नो सम्पत्ति क्षतिबाट आहत हुनुभएका रेशम थारुले छिटोछरितो राहत दिएकोमा नगरप्रमुख के.सी.लाई धन्यवाद दिनुभएको छ । मधुवन नगरपालिका नगरप्रमुख के.सी(कृष्ण)ले आफु स्वयं पीडितको घरमा उपस्थिति भै ब्यक्तिगत रु.१२ हजारको चेक राहत स्वरुप उपलब्ध गराउनुभएको हो ।
रेशम थारु त एक प्रतिनिधि पात्र मात्र हुनुहुन्छ । जंगली जनावरको त्रासमा यहाँँका स्थानियले दिन र रात बिताइरहेका छन । पछिल्लो समय जंगली हात्ती लगायतका जनावर वस्तीमा छिरेर जन-धनको क्षती गरेका घटना बढिरहेका छन । यस्ता घटनाका पीडितहरुलाई नगर प्रमुख केसीले सहयोग गर्दै आउनुभएको छ ।
उहाँले नेपाल कागजसंग कुरा गर्दै भन्नुभयो, " जनताको छोरालाई जनताले आज नगरप्रमुख बनाएर पठाए, मैले आज नगरे कहिले गर्ने? र मैले नगरे कस्ले गर्ने ? म जनताबाटै आएको हुँँ । म जनाताको प्रतिनिधि मात्र होइन प्रतिबिम्ब हुँँ, आवाज हुँँ गुन्जिरहने छु ।"
