जोयल गिरी, बर्दिया । करिब एक महिना अघि झुरिया महिला सामुदायिक वनबाट एउटा सिंगो सालको रुख र सालकै ११ वटा गोलिया नै गायब भयो । रातारात रुख नै सामुदायिक वनबाट गायब भएपछी मधुवन नगरपालिका वडा नम्बर ३ बिपतपुरका वासिन्दा अचम्म र रनभुल्लमा परे ।
उक्त सामुदायिक वनमा आवद्ध उपभोक्ता तथा स्थानीयले यो अचम्मित पार्ने गम्भीर घटनाको आफै सुक्ष्म रुपले अनुसन्धान गर्न थाले । आफै गरेको अनुसन्धानमा उनिहरुले बिपतपुरकै केही ठाउँहरूमा काठहरू लुकाइराखेको पत्ता लगाए ।
त्यसपछि स्थानीयहरूले सो घटनाको बारेमा डिभिजन वन कार्यालय बर्दिया र ईलाका प्रहरी कार्यालय ढोढरीमा जानकारी गराए ।
ईलाका प्रहरी कार्यालय ढोढरी, प्रहरी कार्यालय धनौराबाट खटिएको प्रहरी टोलीले मिति २०८०।०१।२९ गते राती करिब ११ बजे छापा हान्यो । छापा मार्दा प्रहरीले चौध लाख, पैंसठ्ठी हजार , पाँच सय पचास रुपैंया बराबरको अवैध काठ बरामद गर्यो ।
गोप्य सुचना पाएको प्रहरी टोलीले अनुसन्धान गर्दै जाँदा २८३.६१ क्यूफिट काठ फेला पार्यो । ईलाका प्रहरी कार्यालय ढोढरीका प्रमुख प्रहरी निरीक्षक बखत बहादुर शाहीको नेतृत्वमा १२ जना र प्रहरी चौकी धनौराबाट प्रहरी सहायक निरीक्षक निरक बहादुर बस्नेतको कमाण्डमा ४ जना गरी जम्मा १६ जनाको संयुक्त प्रहरी टोलीले शंका गरेका स्थानमा खोजतलास गर्दा ठुलो परिमाणमा काठ बरामद भयो ।
यता यस घटनाको विषयमा ईलाका प्रहरी कार्यालय ढोढरीले प्रेस विज्ञप्ति जारी गरेको छ । उक्त प्रेस बिज्ञप्तिमा भनिएको छ, "बिपतपुर स्थित धर्म बहादुर खत्रीको पुरानो खाली घर भित्र चिरान गरी लुकाई छिपाई राखेको साल जातको काठ ३८.७४ क्यू.फिट, क्रमश सोही घर नजिकै रहेको मकै बारीमा लडियामा लुकाई- छिपाई राखेको ३५ क्यू.फिट, ऐ ऐ स्थित बालकुमारी स:मिल तथा फर्निचर उद्योगमा लुकाई छिपाई राखेको सिसौ जातको चिरान काठ १७६.८७ क्यू. फिट, ऐ जातको गोलिया १२.८२ क्यू.फिट, खएर जातको काठको गोलिया २०.१८ क्यू. फिट र ऐ-ऐ बस्ने जग्गा प्रसाद पाण्डेको ऐ-ऐ स्थानमा रहेको माछा पोखरी नजिकै खाल्डो खनी लुकाई राखेको साल जातको झाप १० क्वीन्टल गरी जम्मा २८३.६१ क्यूफिट काठ अन्दाजी मुल्य रु. १४,६५,५५० ।-( चौध लाख, पैंसठ्ठी हजार , पाँच सय पचास रुपैंया ) बराबरको काठ रित-पूर्वक बरामद गरी खाता सव डिभिजन बन कार्यालय सानोश्री बर्दियामा बुझाईयो ।"
ईलाका प्रहरी कार्यालय ढोढरी र डिभिजन वन कार्यालय बर्दियाले यस विषयमा थप अनुसन्धान गरिरहेको जानकारी दिएको छ ।
प्रकाशित मिति: आइतबार, वैशाख ३१, २०८०, १२:१५:००
1695616735.jpg)
