चिकित्सकसहितको टोली नेपालगन्ज आइपुग्यो, अक्सिजन सप्लाईको व्यवस्थापनमा खट्दै प्रमुख जिल्ला अधिकारी

स्वास्थ्य

Home
स्वास्थ्य
चिकित्सकसहितको टोली नेपालगन्ज आइपुग्यो, अक्सिजन सप्लाईको व्यवस्थापनमा खट्दै प्रमुख जिल्ला अधिकारी

चिकित्सकसहितको टोली नेपालगन्ज आइपुग्यो, अक्सिजन सप्लाईको व्यवस्थापनमा खट्दै प्रमुख जिल्ला अधिकारी

बाँके । कर्णाली स्वास्थ्य विज्ञान प्रतिष्ठान शिक्षण अस्पतालबाट चिकित्सकसहितको टोली सहयोगका लागि सोमबार नेपालगञ्ज आइपुगेको छ । नेपालगञ्जस्थित भेरी अस्पतालको कोभिड वार्डमा जनशक्तिको चरम अभाव भएपछि जुम्लास्थित प्रतिष्ठानका एनेस्थेसिया तथा सघन उपचार विभाग प्रमुख डा.प्रवीण गिरी नेतृत्वको चिकित्सक तथा स्वास्थ्यकर्मीको टोली नेपालगञ्ज आएको हो । स्वास्थ्य तथा जनसङ्ख्या मन्त्रालयको आग्रहपछि प्रतिष्ठानका छ चिकित्सक र स्वास्थ्यकर्मीको टीम भेरी अस्पतालमा खटाइएको हो। सघन उपचारका लागि चिकित्सकको अभाव भएपछि सघन उपचार विभागकै इन्चार्ज गिरीको नेतृत्वमा टोली आएको हो ।

डिसिसिएमसी बाँकेका फोकल पर्सन तेज ओलीका अनुसार भेरी अस्पताल बाँकेमा कोरोना उपचार गर्न जनशक्तिको अभाव भएपछि प्रमुख गिरीसहित डा.अरुण श्रेष्ठ, डा.हरि न्यौपाने, नर्सहरु सुष्मिता खड्का, तेन्जिङ लामा र प्यारामेडिक्स नरेन्द्र शर्मा भेरी अस्पतालमा आउनु भएको हो। फोकल पर्सन ओलीका अनुसार जिल्लामा बिरामीको चापको अनुपातमा अझै पनि स्वास्थकर्मीहरुको जनशक्ति अत्यन्तै कम रहेको छ ।"जिल्लामा स्वास्थकर्मीको जनशक्ति व्यवस्थापनमा हामी लागेका छौँ, हाल अक्सिजनको शर्टेज समेत भएको छ," ओलीले भन्नुभयो। "अक्सिजन सप्लाईको व्यवस्थापनको लागी प्रमुख जिल्ला अधिकारी ज्युको नेतृत्वमा हामी लागेका छौँ ।"

हालसम्म सो अस्पतालका ७३ जनाभन्दा बढी स्वास्थ्यकर्मी सङ्क्रमित छन्। जनशक्ति अभावमा केही स्वास्थ्यकर्मी सङ्क्रमित भएर पनि उपचारमा खटिएको ओलीले बताउनुभयो ।

प्रकाशित मिति: सोमबार, वैशाख २०, २०७८ १०:५३

प्रतिक्रिया दिनुहोस्