काठमाडौँ । नेपाली कांग्रेसको आज बस्ने भनिएको केन्द्रीय कार्यसमितिको बैठक फेरि सरेको छ । आज दिउँसो बस्ने भनिएको बैठक आइतबारका लागि सारिएको छ ।पार्टीका मुख्यसचिव कृष्णप्रसाद पौडेलले प्रेस विज्ञप्ति जारी गर्दै आज दिउँसो २ बजे बस्ने भनिएको बैठक आइतबार दिउँसो २ बजेसम्मका लागि सरेको हो ।
उक्त बैठकमा केन्द्रीय कार्यसमितिका पदाधिकारी, सदस्य, आमन्त्रित सदस्य र सात वटै प्रदेश कार्यसमितिका सभापतिहरूको उपस्थितिका लागि निर्देशानुसार अनुरोध गरिएको उनले विज्ञप्तिमा उल्लेख गरेका छन् । तर बैठक किन सार्नु परेको भनी कुनै उल्लेख गरिएको छैन ।
पटक पटक बैठक सारेर नेपालकै सबैभन्दा ठूलो दलले तमासा गरिरहेको भनी चर्को आलोचना भएको छ । पार्टीको यही मंसिरभित्रै गर्नुपर्ने चुनावी महाधिवेशन सार्नका लागि अनेक प्रचञ्च रच्न बैठक बस्न ढिलाइ गरेको भनी आलोचना भइरहेको हो ।
राजनीतिक विश्लेषकहरू कम्युनिष्टहरूले महाधिवेशन सार्नु वा एउटै नेतृत्व वर्षौँसम्म अगाडि बढ्न सक्ने भए पनि लोकतान्त्रिक पार्टी कांग्रेसलाई नसुहाउने तर्कसमेत गरेका छन् ।
कांग्रेस स्रोतका अनुसार संस्थापन र संस्थापन इतर पक्षबीच पटक पटक छलफल भए पनि सहमति जुट्न नसकेपछि बैठक आइतबार सम्मका लागि सरेको हो ।
विधानलाई नै मिच्ने गरी सहमति गर्न खोजिएपछि बैठकमा सहमति जुट्न नसकेको हो।
गत असोज २८ गतेदेखि बसेको केन्द्रीय कार्यसमिति बैठक मंसिर ६ गते महाधिवेशन सम्बन्धी कुनै निर्णय नै नगरी टुंगिएको थियो । तर असोज २९ गते नै ५४ प्रतिशत महाधिवेशन प्रतिनिधिले विशेष महाधिवेशन माग गरेर हस्ताक्षर बुझाएकाले त्यसको तीन महिनाभित्र कुनै पनि हालतमा विशेष महाधिवेशन गर्नुपर्ने विधानमा उल्लेख छ ।
संस्थापनले भने महाधिवेशन गरे पनि विशेष महाधिवेशन नगरी नियमित गर्नुपर्ने र त्यसका लागि विशेष महाधिवेशनको माग फिर्ता लिन सर्त राखेको बुझिएको छ ।
कांग्रेसभित्र पार्टीको महाधिवेशन गरी नयाँ नेतृत्व र एजेन्डासहित फागुन २१ गतेको प्रतिनिधि सभा निर्वाचनमा सहभागी हुन जोड दिइएको छ ।
