रुकुम पश्चिम । प्रभु बैंकका अप्रेसन इन्चार्ज नीरजविक्रम शाह ६ दिनदेखि बेपत्ता भएका छन् ।रुकुम पश्चिमको आठबिसकोट नगरपालिकाको राडी बजारस्थित प्रभु बैंकका अप्रेसन इन्चार्ज शाहलाई बैंकमा बचत गर्न पैसा दिएको र बचत गरेको नक्कली भौचरबाट झुक्याएर पैसा अपचलन गरेर भागेको आरोप लागेको छ । आफ्नो बचत रकम हिनामिना गरेर शाह बेपत्ता भएको भन्दै बचतकर्ताहरू हरेक दिन शाखा कार्यालयमा भेला हुने गरेका छन् ।
आठबिसकोट नगरपालिका– १३ का शंकर पुनले आफ्नो खातामा रहेको १० लाख रुपैयाँ थाहा नै नदिएर अर्कैको खातामा ट्रान्सफर भएको बताए । बैंकमा गएर बुझ्दा आफ्नो खातामा रहेको पैसा अन्यत्रै पठाएको बताए । बैंकमा बचत गर्न पैसा दिएको र बचत गरेको नक्कली भौचर दिएर झुक्याइएको बचतकर्ताहरूको गुनासो छ । बचतकर्ताहरू आफ्नो रकम फिर्ताको माग गर्दै भेला हुने गरेका छन् ।
शंकास्पद देखिएपछि आन्तरिक अनुसन्धान थालिएको छ । बैंकको कर्णाली प्रदेशबाट आएका दुईजनाको टोलीले अनुसन्धान गरिरहेको शाखा प्रमुख डम्बर गौतमले जानकारी दिए । अनुसन्धान चलिरहेको छ, गडबडी भए–नभएको अनुसन्धान सकिएपछि मात्र थाहा हुन्छ ।’ अनुसन्धानका लागि केन्द्रको टोलीसमेत आउन लागेको उनले बताए ।
पायल्सको अप्रेसन छ, एक दिनका लागि भए पनि बिदा दिनुपर्यो, नेपालगन्ज जानु छ भनेर शाह सम्पर्कविहीन भएको उक्त बैंकका शाखा प्रमुख गौतमको भनाइ छ । उनले बचतकर्ताको खाताबाट पैसा निकालेको भन्ने हल्ला मात्र भएको दाबी पनि गरे । ‘कुनै पनि बचतकर्ताको खाताबाट पैसा निकालेको देखिएको छैन, यसमा सत्यता छैन । तर, हामी अनुसन्धानमा छौँ,’ उनले भने ।
शाहमाथि व्यक्तिगत कारोबारको आशंका गरिएको उनले बताए । केही व्यक्तिले शाहलाई ऋण दिएको र एकाएक बेपत्ता भएको थाहा पाएपछि आत्तिएको हुन सक्ने शाखा प्रमुख गौतमको भनाइ छ । सोमबारसम्ममा अनुसन्धान सकिने र त्यसपछि यसबारेमा थप जानकारी दिने उनको भनाइ छ ।
यता सवा करोड अपचलन भएको प्रारम्भिक जानकारी आइपुगेको प्रहरीले बताएको छ ।
जिल्ला प्रहरी कार्यालय रुकुम पश्चिमले यो मुद्दा उच्च अदालतले हेर्ने भएका कारण सुर्खेत प्रहरीअन्तर्गत रहने जनाएको छ । यो मुद्दा उच्च अदालतको कार्यक्षेत्रभित्र पर्ने भएकाले उच्च अदालत रहेको जिल्ला सुर्खेत प्रहरीले हेर्ने जिल्ला प्रहरी प्रमुख प्रहरी नायब उपरीक्षक नमराज भट्टराईले जानकारी दिए । प्रारम्भिक जानकारी अनुसार एक करोड ३५ लाख अपचलन भएको देखिएको छ । बैंकको प्रदेश कार्यालयले अहिलेसम्मको अनुसन्धानबाट उक्त परिमाणको रकममा अपचलन भएको देखिएको जानकारी गराएको डिएसपी भट्टराईले बताए ।
