बर्दिया । डिभिजन वन कार्यालय बर्दियाले चालु आर्थिक वर्ष २०७७/०७८ मा ४९ लाख ५८ हजार रुपैँया मानव वन्यजन्तु द्वन्दका घटनाबाट पीडित भएकाहरूलाई राहत उपलब्ध गराएको छ ।
मानव वन्यजन्तु द्वन्द न्युनिकरणका लागि बिहिवार बर्दियाको गुलरियामा संचारकर्मीहरुसँगको अन्तर्कृया कार्यक्रममा डिभिजन वन कार्यालय बर्दियाले उक्त जानकारी साझा गरेको हो ।
वन्यजन्तुको आक्रमणबाट मृत्यु भएका ४ जनालाई जनही १० लाखका दरले रु. ४० लाख, घाइते भएका ७ जनालाई २ लाख १२ हजार ३ सय ३८ रुपैयाँ र पशुधन क्षती भएका ९१ जनालाई ४ लाख ७७ हजार र घरगोठ अन्न बाली क्षति भएका ४९ जनालाई २ लाख ६८ हजार ७ सय ५० रुपैयाँ राहत स्वरुप उपलब्ध गराएको डिभिजन वन कार्यालय बर्दियाका डिभिजनल प्रमुख अधिकृत प्रविण विडारीले जानकारी दिनुभयो । २०७५ साल पछि बर्दियामा मानव वन्यजन्तु विचको द्वन्द बढ्दो क्रममा रहेको छ ।
वन कार्यालयको क्षेत्राधिकार भित्र आर्थिक वर्ष ०७५/०७६ देखि चालु आर्थिक वर्ष सम्म वन्यजन्तुका कारण १३ जना मानिसले ज्यान गुमाइ सकेका छन् । द्वन्द न्युनिकरणका लागि आर्थिक वर्ष ०७७/०७८ मा वन्यजन्तुबाट वढि प्रभावित वन क्षेत्र भित्र रहेका मधुवन नगरपालिका वडा नं. २ स्थित कुश्मिनिया सामुदायिक वनको ११ सय मिटर र वडा नं. ३ स्थित सम्झना र दलित महिला सामुदायिक वनको ११ सय मिटर क्षेत्रमा ४० लाखको लगानीमा मेस वायर फेन्सिङ्गको काम भैसकेको डिभिजन वन कार्यालय प्रमख विडारीले कार्यक्रममा जानकारी गराउनुभयो ।
डिभिजन वन कार्यालय प्रमख विडारीले भन्नुभयो, "मधुवन ३ स्थित गौरी महिला र सम्झना सामुदायिक वन र सोनाहा फाँटा गरि १५ सय ६५ मिटर क्षेत्रमा २७ लाखको लगानीमा मेस वायरको काम भैसकेको छ । वन्यजन्तुबाट बढि प्रभावित मधुवन नगरपालिको वडा नं. १, २ र ३ नं. वडाका विभिन्न स्थानका २८ ठाउँमा सडक बत्ती जडान गरिएको र खाता क्षेत्रका १० विद्यालयमा संरक्षणमुखी स्कुल शिक्षा कार्यक्रम संचालन गरिएको छ । द्वन्द न्युनिकरणका लागि बैकल्पिक खेती अन्तर्गत कागती, बेसार, खुर्सानी, मेन्था क्यामोमाईल जस्ता जडिबुटिजन्य विरुवाको खेती गर्न कृषकहरुलाई सहयोग गरिएको छ ।"
आगामी वर्षहरुमा वन क्षेत्रको उपयोग कम गर्न वैकल्पिक उर्जा कार्यक्रम, जिविकोपार्जन कार्यक्रम, मानव जिवन विमा, पशुधन विमा, अन्नवालीको विमा जस्ता कार्यक्रम समेट्ने योजना रहेको डिभिजन वन कार्यालयले जानकारी दिएको छ ।
त्यस्तै अती संबेदनसिल क्षेत्रको रुपमा रहेको मानव वस्तीहरुलाई स्थानान्तरण गर्ने योजना बनाउने डिभिजन वन कार्यालयका डिभिजनल प्रमुख अधिकृत विडारीको भनाई छ ।
कार्यक्रममा नेपाल पत्रकार महासंघ बर्दियाका अध्यक्ष यादव आचार्यले वन र वन्यजन्तुलाई हामी सबै मिलेर बचाउनु पर्छ भनी समाचार लेख्दा समुदायबाट विभिन्न किसिमको कमेन्ट गाली गलौच आक्षेपहरु आउने गरेको बताउनुभयो ।
अध्यक्ष आचार्यले भन्नुभयो, "ओराली बजारको घटना मानव वन्यजन्तु द्वन्द नभएर मानव र राज्यको द्वन्द हो । यो शुरूवात मात्रै भएको हो। यति मात्रै हैन यस्ता घटना नदोहोरिन दिन तपाईं हामी सचेत हुनुपर्छ । त्यहाँका स्थानीय पीडितलाई राज्यले उचित संरक्षण, सहयोग र साथ दिनुपर्छ । जनावरको आक्रमणबाट जनता मृत्यु गमन गरिरहेका छ्न, तपाईं हामी टुलुटुलु हेरेर बस्न मिल्दैन । हामीले जनावर मात्र होइन जनताको पनि संरक्षण गर्नुपर्छ तथा राहत छिटोछरितो, तत्कालै समयमै उपलब्ध गराउनुपर्छ ।"
महासंघ अध्यक्ष आचार्यले डिभिजन वन कार्यालय बर्दियाले वन र वन्यजन्तुको व्यवस्थापन मात्र नभएर मानव र वस्तीको व्यवस्थापनमा पनि भुमिका खेल्नुपर्ने बताउनुभयो ।
