सन्दिप नाथ योगी, अनोज थारू, बर्दिया । बर्दियाका केही दिग्गज नेता तथा पत्रकारहरुसँग नेपाली कांग्रेसका नेता विनय रावलसँग साक्षात्कार गर्ने मौका मिल्यो ।
नयाँ बानेश्वरमा रहेको कार्यालयमा हामी केही पत्रकार तथा कांग्रेसका नेताहरूसँग भेट गर्दै रावलले बर्दियाको विकासको बारेमा आफ्नो धारणा सुनाउनु भयो ।
हामी पत्रकारले धेरै नेताहरूसँग भेटघाटको मौका पाएका हुन्छौं तर थोरै नेताले मात्रै आफ्नो भिजन र सोंचको बारेमा सुनाउने गर्छन ।
प्राय नेतृत्वगणहरुले राजनीति र सत्तालाई केन्द्रबिन्दुमा राखेर बोल्ने गरेका हुन्छन । नेता रावलसँग भेट हुँदा उहाँले एउटै कुरा दोहोर्याएर भन्नुभयो, "लौन म बर्दियाको विकास र बर्दियाका जनताका लागि केही गर्न चाहन्छु, समृद्ध बर्दिया बनाउने अभियानमा एउटा इट्टा थप्न चाहन्छु, मलाई काम गर्न दिनुपर्यो ।"
हुन त यो अनुनय हामी पत्रकारसँग नभएर त्यहाँ उपस्थित नेताहरूसँग रावलले गर्नुभएको थियो तर ती वाक्यले मनलाई नमिठो तरिकाले उद्धेलित तुल्यायो ।
लाग्यो के बर्दियाको विकास गर्छु भन्ने ब्यक्तिलाई काम गर्न दिइँदैन, दिन खोजिएको छैन वा बर्दियाको राजनीतिमा स्पेस दिन नचाहनेहरुको बर्दियामा बाहुल्यता छ ।
दुबै प्रश्नको उत्तर समयले बताउने छ नै किनभने समय बलवान् छ ।
समयको शक्तिलाई न हामीले बुझ्न सकेका छौँ न कसैले बुझ्न नै सक्छ तर के त्यो समय आउला जहाँ बर्दियाको विकासमा रावलले भनेझैं एउटा इट्टा थप्न दिइएला ? यो प्रश्न पनि हामी समयको गर्भाशयमै छोडौँ ।
मुख्य कुरा के भने विनय रावल साँच्चै बर्दियाको विकास गर्न चाहन्छन त ? यदि चाहन्छन भने उनको सोँच, बिचार, भिजन र विकासको अवधारणा के छ ? यी प्रश्नको उत्तर खोज्ने भाउन्नमा हामीले रावलसँग दोस्रो भेट गर्यौं ।
हामीले उहाँलाई सोध्यौँ, "बर्दियाको विकासको बारेमा तपाईंको भिजन के छ ? तपाईंलाई काम गर्न नदिइएको हो ? काम गर्न नदिनुको कारण के होला ?
विनय रावल
महाधिवेशन प्रतिनिधि
नेपाली कांग्रेस
यो प्रश्नको उत्तर म तपाईंहरुसँग खोजी रहेको छु । तपाईंहरु भन्नुहोस मलाई काम गर्न किन दिइदैन ? बर्दियाका क्यान्सर पीडितको उपचारमा सहयोग, बिद्यार्थीहरुलाई छात्रवृत्ति, मानव वन्यजन्तु द्वन्द्वका घटनामा ज्यान गुमाएका, घाइते भएकालाई सयोग गर्नु मेरो गल्ती हो ? बर्दियाका आमाबुबाहरुलाई पशुपति नाथको तिर्थाटन गराउनु मेरो गल्ती हो वा त्यहाँका पुर्वाधार विकासमा म सहयोग गर्छु योजना ल्याउनुस भन्नू मेरो गल्ती हो ? के चाहिँ मेरो गल्ती हो ? मैले बेटर एण्ड ब्राइटर बर्दियाको भिजन (अवधारणा) ल्याउनु मेरो गल्ती हो ?
देशमा धेरै नेता तथा मानिसहरु छन जसले देश र समाजका लागी काम गर्न चाहन्छन तर काम गर्न दिइदैन । काम गर्न नदिइनुमा विभिन्न स्वार्थहरुले काम गरेको छ ।
यदि विनय रावलले काम गरेर देखायो भने कतै जनताहरु उसको पछाडि त लाग्दैनन, कतै हाम्रो राजनीति त धर्मराउँदैन भन्ने संशयले समेत काम गरेको होला । तर त्यस्तो नसोच्न अनुरोध गर्छु । म कसैको राजनीति बिगार्न आएको होइन, कसैलाई दुख दिन आएको होइन । म त बर्दियाका जनता र नेताहरू सँग मिलेर काम गर्न चाहन्छु ।
मलाई बर्दियामा काम गर्ने नेता तथा कार्यकर्ताहरुको अत्यन्तै आवश्यकता छ । म उहाँहरू सँग मिलेर अगाडि बढ्न चाहन्छु । म बेटर एन्ड ब्राइटर बर्दियाको सपनालाई साकार गर्न चाहन्छु । मलाई थाहा छ यो एक्लै सम्भव छैन, मलाई यो पनि थाहा छ साथ दिने कोहि छैनन तर म हार्ने छैन, थाक्ने छैन ।
मलाई विश्वास छ एकदिन बर्दिया बनाउनु पर्छ भन्ने धेरै हातहरु मेरा हातहरुसँग मिल्न आउनेछन । आज मेरो बिरोध गरेर आत्म रमितामा रमाउनेहरुलाई पछुतो हुनेछ । काम गर्छु, समाज र बर्दियाको विकास गर्छु भनेर आएको मलाई एक दिन काम गर्न नदिनेहरुले नै स्वागत गर्नुहुनेछ । हाते मालो गर्नुहुने छ किनकी म थाक्ने छैन, रुक्ने छैन ।
बेटर एन्ड ब्राइटर बर्दिया
कृषी र पर्यटनको सम्भावनाको खानी हो बर्दिया । हेर्नुस् कुनै बेला भारतका व्यापारीहरु धान किन्न बर्दियाको राजापुरमा आउँथे । भनेपछि बर्दियाको माटो कृषिको लागी अत्यन्तै राम्रो छ ।
कृषीमा प्राविधिको प्रयोग गरेर बर्दियाको विकास गर्न सकिन्छ । त्यहाँका किसानलाई प्रविधिसँग जोड्ने काम गरौँ । त्यहाँका किसानले उच्च कोटीको राम्रो बीउ पाउन नसकेको अवस्था छ । त्यसको समाधान गरौं । सिंचाइको समस्या छ । त्यसलाई समाधान गरौँ । बर्दिया कृषिमा आत्मनिर्भर भयो भने विकास त्यहीँ बाट सुरु हुन्छ ।
पर्यटनको कुरा छ । बर्दिया राष्ट्रिय निकुञ्ज त्यहीँ छ । चितवन राष्ट्रिय निकुञ्जको बारेमा सबैलाई थाहा छ तर बर्दिया राष्ट्रिय निकुञ्जको बारेमा थाहा भएर पनि ओझेलमा परेको छ । हामीले आन्तरिक पर्यटनलाई बढावा दिनसकेका छैनौं । उचित प्रचारप्रसार भएन ।
बर्दिया राष्ट्रिय निकुञ्जलाई केन्द्रमा राखेर धेरै होम स्टे र होटेलहरु खुलेका छन । तर पर्यटकको चाप कम छ । बर्दिया राष्ट्रिय निकुञ्जमा पाइने फेसिलिटी, हेर्न र गर्न सकिने कुराहरु, टुरिष्टको लागि आकर्षित गर्न सक्ने योजनाहरु बनायो भने त्यहाँका व्यवसायीहरुलाई फाइदा हुनेछ । धेरैले रोजगारी पाउनेछन ।
ती होटेलमा यहिँका स्थानीय तरकारी, दाल चामल प्रयोग हुनेछन । किसानलाई फाइदा हुनेछ । एउटा चक्र आफै घुम्नेछ । एउटा क्षेत्रलाई चलायमान गराउन सक्यो भने अन्य क्षेत्र आफै चलायमान हुनेछन । म यही भनिरहेको छु कि आउनुहोस मिलेर अगाडि बढौँ ।
अचम्म त के लाग्छ भने केही गर्छु भन्यो बिरोधका स्वरहरु गुन्जिन्छन । म मेरा बिरोध गर्ने आमाबुबा, दाजुभाइ, दिदिबहिनी तथा नेता कार्यकर्ताहरूलाई के भन्न चाहन्छु भने आउनुहोस सुन्दर र समृद्ध बर्दियाको सपना सँगै साकार गरौँ ।
म बर्दियामा केही लिन आएको होइन, यो माटोलाई दिन आएको हुँ । म बर्दियाका जनताको लागि काम गर्न चाहन्छु । कृपया मलाई साथ दिनुहोस । हात मिलाउनु होस । हो मेरो र तपाईंको काम गर्ने शैली भिन्न होला तर उदेश्य त एउटै छ । 'आफ्नो मातृभुमीको सेवा ।'
