अनोज थारू, सन्दिप नाथ योगी, बर्दिया । नेपाली कांग्रेस बर्दियाले आफ्ना नेता तथा कार्यकर्तालाई स्पष्टीकरण सोध्नुका साथै कारबाही गरेको छ ।
नेपाली कांग्रेस बर्दियाले आफ्ना ३९ जना नेता/कार्यकर्तालाई स्पष्टीकरण सोधेको छ भने २ जनालाई निलम्बन गरेको छ ।
नेपाली कांग्रेस अनुशासन समिति बर्दियाले आफ्ना केन्द्रिय सदस्य डा. गोपाल दहितलाई समेत स्पष्टीकरण सोधेको छ । डा. गोपाल दहित नेपाली कांग्रेसका केन्द्रिय नेता हुनुहुन्छ ।
स्थानीय तह निर्वाचन २०७९ मा पार्टीका आधिकारिक उम्मेदवारहरुलाई असहयोग गर्ने ३९ जनालाई स्पष्टीकरण सोधिएको नेपाली कांग्रेस अनुशासन समिति बर्दियाका संयोजक जग्गा प्रसाद पाण्डेले बताउनुभयो ।
पार्टीको आर्दश, उद्देश्य, नीति र आचारसंहिता बिपरीत आधिकारिक उम्मेदवारहरुलाई असहयोग गरी बिपक्षमा प्रचार प्रसार गरेकाले नेपाली कांग्रेसको बिधान २०१७ (संशोधन सहित) को दफा ४३ को ४ को उपदफा (ङ) बमोजिम स्पष्टीकरण सोधिएको संयोजक पाण्डेले बताउनुभयो ।
उहाँले स्थानीय तहको निर्वाचनमा उम्मेदवारहरुलाई असहयोग गर्ने ३४ जना र कार्यपालिका निर्वाचनमा असहयोग गर्ने ५ जनालाई स्पष्टीकरण सोधिएको तथा २ जनालाई पार्टीबाट निलम्बन गरिएको बताउनुभयो ।
स्पष्टीकरण सोधिएका मध्य सबैभन्दा बढी गुलरीया नगरपालिकामा रहेका छन । गुलरीया नगरपालिकाका १७ जनालाई स्पष्टीकरण सोधिएको छ ।
त्यसैगरी मधुवन नगरपालिकामा ७ जना, राजापुर नगरपालिकामा ५ जना, बढैयाताल गाँउपालिकामा ५ जना, बाँसगढी नगरपलिकामा ५ जनालाई अनुशासन समितिले स्पष्टीकरण सोधेको छ ।
गुलरीया नगरपालिका वडा नं ८ का प्रदीप लोध, भोमे थारु, बिजय लोध, राम प्यारी थारु, संखि थारु, दिपेश थारु, प्रतिमा थारु, बिक्रम थारु, आमन थारु, बीर बहादुर दमाई, जमुना प्रसाद लोध, सुमि थारु, साकीर गद्दी, गुलरीया वडा नं १० का मुमताज अली अन्सार, बिरेन्द्र कुमार थारु, आत्मराम बर्मा र इदरिस बेहना गरी १७ जनालाई स्पष्टीकरण सोधिएको छ ।
त्यसैगरी मधुवन नगरपालिका वडा नं ३ का छुदराम थारु, लौटन दास थारु, भरत केसी, केशव केसी, धु्रब पौडेल, वडा नं ४का बलिराम थारु र दिलीप गुरुङ्ग गरी ७ जनालाई स्पष्टीकरण सोधिएको छ ।
त्यस्तै, राजापुर नगरपालिका वडा नं २ का गोपाल दहित, सिताराम थारु, वडा नं ४ का गोबिन्द रेग्मी, बिश्वमान प्रधान र मिलन रेग्मीलाई स्पष्टीकरण सोधिएको छ ।
त्यसैगरी, बढैयाताल गाँउपालिकाको वडा नं २ का बिनु प्रसाद पाण्डे, वडा न.४का कृष्ण मोहन थारु, वडा नं ६का भोदु प्रसाद थारु, वडा नं ८ का नेत्र बहादुर रानाभाट र तारानाथ अर्यालगरी ५ जनालाई स्पष्टीकरण सोधिएको छ ।
त्यस्तै, बाँसगढी नगरपलिका वडा नं ५ का लोहारी थारु, आकास थारु सोमति, ओम प्रसाद पौडेल, सोधे बिष्ट र गंगाधर पौडेलगरी ५ जनालाई अनुशासन समितिले स्पष्टीकरण सोधेको छ ।
त्यसैगरी कार्यपालिकाको निर्वाचनमा असहयोग गरेको भन्दै २ जनालाई निलम्बन गरीएको छ । मधुवन नगरपालिका वडा नं ५ का प्रेम गुरुङ र बाँसगढी नगरपालिका वडा नं ५ का सबिन थापालाई निलम्बन गरेको संयोजक पाण्डेले बताउनुभयो ।
यता निर्वाचनको मिति घोषणा हुनै लाग्दा यसरी खाँटी नेता तथा कार्यकर्तालाई कारबाही गर्दा आउँदो प्रदेश तथा प्रतिनिधिसभा निर्वाचनमा असर पुग्ने आँकलन गरिएको छ । नेपाली कांग्रेसका नेता तथा कार्यकर्ताहरुलाई सोधिएको स्पष्टीकरण र कारबाहीले झनै वैमनस्यता ल्याउने त होइन भन्ने प्रश्न पनि उब्जिएको छ ।
यस विषयमा हामीले नेपाली कांग्रेस बर्दियाका सभापति अरुण सिंह राठौरसँग प्रतिक्रिया मागेका थियौँ । उहाँले पार्टीमा अनुशासन कायम गर्न अनुशासन समितिले बिधान बमोजिम स्पष्टीकरण सोधेको हुनसक्ने बताउनुभयो ।
'पार्टीका नेता तथा कार्यकर्तालाई सन्देश दिन जरुरी थियो त्यसैले अनुशासन समितिले बिधान बमोजिम आफ्नो काम गरेको होला ।' उहाँले भन्नुभयो, 'जिल्ला अनुशासन समितिले प्रदेश र केन्द्रिय समितिलाई कारबाही तथा स्पष्टीकरण सोधेको पत्र पठाएको होला ।'
त्यस्तै अनुशासन समितिका संयोजक पाण्डेले पार्टीमा हुने अराजकतालाई रोक्न, अनुशासन कायम गर्न कारबाही गरिएको बताउनुभयो ।
प्रतिनिधिसभा तथा प्रदेशसभा निर्वाचन नजिँकिदै गरेको अवस्थामा यो कारबाहीले कांग्रेसलाई क्षति पुर्याउने कतिपय नेताकार्यकर्ताको आँकलन छ नि भन्ने प्रश्नमा संयोजक पाण्डेले भन्नुभयो, 'पार्टी र पार्टीका आधिकारिक उम्मेदवारलाई अन्तर्घात गर्दै जानेलाई पार्टीले अन द स्पट (ठाउँको ठाउँ) कारबाही गर्छ । त्यही निर्वाचनको बखत कांग्रेसलाई अन्तर्घात गर्नेहरुलाई स्पष्टीकरण तथा कारबाही गरिएको हो । अब आउने निर्वाचनमा नेपाली कांग्रेसले झनै क्षति नबेहोर्नुपरोस भनेर कारबाही गरिएको हो ।"
नेपाली कांग्रेसका केन्द्रिय सदस्य तथा पुर्वमन्त्री डा. गोपाल दहितसँग स्पष्टीकरण सोधिएको विषयमा प्रतिक्रिया माग्दा उहाँले आफू कार्यक्रममा रहेको पछि प्रतिक्रिया दिने बताउनुभयो ।
