बाँके । निर्वाचन सुरक्षा व्यवस्थापनमा राज्यका चारवटै सुरक्षा निकाय नेपाल प्रहरी, सशस्त्र प्रहरी बल, राष्ट्रिय अनुसन्धान विभाग र नेपाली सेना परिचालन गरिनेगरी सरकारले तयारी गरेको छ । निर्वाचन सुरक्षामा मतदान स्थल सुरक्षाको पहिलो घेरामा प्रहरी, त्यसपछि म्यादी प्रहरी, सशस्त्र प्रहरी र सेनालाई राखिनेछ ।
विसं २०७४ को स्थानीय निर्वाचनमा बाँकेमा २ लाख ४६ हजार १०३ मतदाता रहेकोमा यस वर्ष कूल ३ लाख २९ हजार ४७३ मतदाता छन् । जिल्ला निर्वाचन कार्यालयका अनुसार मतदाता सङ्ख्या बढेकाले ५२ मतदान केन्द्र थपिएको छ । हाल जिल्लामा मतदान केन्द्र ३७९ छन् ।
आगामी वैशाख ३० गते हुने स्थानीय तह निर्वाचनमा बाँकेका विभिन्न ६ स्थानीय तहमा रहेका १३६ मतदानस्थल मध्ये १०१ मतदानस्थल अति संवेदनशीलका रुपमा वर्गीकरणमा परेका छन भने ३५ मतदानस्थल संवेदनशील मतदानस्थलको रुपमा वर्गीकरणमा परेका छन ।
बाँके प्रहरीको निर्वाचन सुरक्षा रणनीति, व्यवस्थापन र तयारी तीब्र रुपमा अगाडि बढेको जिल्ला प्रहरी कार्यालय बाँकेले जनाएको छ । स्थानीय तह निर्वाचनका लागि जिल्ला सुरक्षा समितिले विभिन्न स्थानीय तहका मतदानस्थलको अनुगमन सुरु गरेको छ ।
जिल्ला प्रहरी कार्यालय बाँकेका प्रवक्ता प्रहरी नायब उपरीक्षक मधुसुदन न्यौपानेका अनुसार सम्भावित खतराको बारेमा मूल्यांकन गर्न, पूर्व सूचना लिन, सुरक्षा सतर्कता बढाएर निर्वाचन भयरहित बनाउन तथा समयमै आवश्यक कारबाही गर्न बाँके प्रहरीले सादा पोशाकमा प्रहरी परिचालन गरेको छ ।
उहाँले भन्नुभयो, "आज देखी म्यादी प्रहरीको तालिम सुरुभएको छ । अन्य सुरक्षा निकायसँग समन्वय गरिरहेका छौँ । सम्भावित खतराको बारेमा मूल्यांकन गर्न, पूर्व सूचना लिन, सुरक्षा सतर्कता बढाएर निर्वाचन भयरहित बनाउन तथा समयमै आवश्यक कारबाही गर्न हामीले सादा पोशाकमा प्रहरी परिचालन गरेका छौँ । पछिल्लो समय साना हतियार सहित ब्यक्तिहरू पक्राउ गरेका छौँ ।"
यस अघि बाँके प्रहरीले ५ थान अटोमेटिक पेस्तोल सहितका साना हतियारहरू बरामद गरिसकेको अवस्था छ । त्यस्तै जिल्ला प्रशासन कार्यालय बाँकेले इजाजत लिएका हतियार बुझाउन सम्बन्धित व्यक्तिलाई आग्रह गरेको छ ।
केन्द्रीय सुरक्षा समितिको निर्देशन तथा जिल्ला सुरक्षा समितिको निर्णयानुसार स्थानीय तहको निर्वाचनमा भरपर्दो र विश्वसनीय सुरक्षा व्यवस्थापन गर्न हतियार चैत मसान्तभित्र बुझाउन प्रशासनले सूचना जारी गरिसकेको छ ।
निर्धारित समयभित्र हतियार नबुझाए खोजतलास गरी कानुनबमोजिम कारबाही गरिने जिल्ला प्रशासन कार्यालय बाँकेले जनाएको छ ।
बाँकेमा ५५५ जनाले इजाजतप्राप्त हतियार राख्ने अनुमति लिएका छन जसमा बारबोर, बाइसबोर, एकनाले, दुईनाले भरुवा बन्दुक र केही पेस्तोल रहेको जिल्ला प्रशासन कार्यालयले जनाएको छ ।
