आफ्नो मतको सहि प्रयोग गरौँ ।

समाज

Home
समाज
आफ्नो मतको सहि प्रयोग गरौँ ।

आफ्नो मतको सहि प्रयोग गरौँ । (सम्पादकीय)

निर्वाचन आयोगले निर्वाचन कार्यक्रम सार्वजनिक गरे संगै गाँउ नगर पुन निर्वाचनमय हुन थालेको छ । बिगतको निर्वाचन सम्पन्न भए संगै शहरमा हराएका दल र तिनका भात्रृ संगठनमा आवद्ध नेता तथा तिनीहरुका क्रियाशील कार्यकर्ता फेरी मिठा सपना बोकेर झुपडी झुपडीमा अत्यन्त देखावटी आत्मियता र प्रेमले हातेमालो गर्न थालेको पाइन्छ । मानौ घटना क्रम यस्तो लाग्छ जनता एउटा नाटकमा उपस्थित दर्शक मात्र हुन र तिनै दल आवद्ध पात्रले बाड्ने भ्रम सदैव बिश्वास गर्छन । त्यसैले पनि अबको केहि दिन तपाई हामि सबैको लागि एउटा निर्णायक र महत्वपूर्ण समयका रुपमा रहेको छ ।

सार्वभौमसत्ता सम्पन्न नागरिकले अबको निर्णय स्थायित्व र सम्वृद्धिका लागि काम गर्ने दल र तिनका प्रतिनिधि चयन गर्ने बेला भएको छ । मिठा आश्वासन र भ्रम देखाई मिठा ललिपप देखाउने, एक छाक मिठो मसिनो खुवाउने, जितका लागि नगद र डारु पानी बगाउने होइन देश र जनताको सम्वृद्धि,बसुखको बाटोमा डोराउने सच्चा व्यक्तिको चयन अन्तर आत्माबाट छान्नु पर्ने समय आएको छ । यसबाट मात्र सार्वभौम नागरिकको सहि रुपले अधिकारको उपयोग हुने छ ।

अबको निर्वाचनमा उम्मेदवार हुने जनप्रतिनिधिलाई प्रश्न गर्नु पर्छ कि हिजोका दलका घोषणा पत्रको कार्यान्वयन कति भयो ? स्थानीय तहको नीति तथा कार्यक्रमले गरिवको कल्याण गर्‍यो कि मुठ्ठीभरका व्यक्तिलाई मात्र हित गर्‍यो ? त्यसले जनताको सम्वृद्धिको चाहनालाई पुरा गर्‍यो त ? जनताको करले जनतालाई हित गर्‍यो कि सिमित टाठाबाठालाई कमिसन खानलाई निर्मित तथाकथित स्वागत गेट र भ्युटावर जस्ता अनुत्पादन क्षेत्रमा खर्च गरियो ? लगायतका सयौ प्रश्नको जवाफ माग्नु पर्ने समय आएको छ । र भन्नु पर्छ रोजगार र उत्पादन मुलक जनहितका कार्यक्रम दिने, आफनै घर दैलोमा सेवा सुबिधा पाउने, शिक्षा स्वास्थ्यका लागि घर खेत बेच्नु नपर्ने, शान्ति र चयनका साथ बाँच्न पाउने व्यबस्थाको ग्यारेन्टी दिने, हाम्रा भन्दा राम्रा प्रतिनिधि चयन गर्नु पर्दछ । यसले मात्र हाम्रो र हाम्रा भावी पिढीलाई सुख, शान्ति र सम्वृद्धि दिने छ ।

लोकतान्त्रिक मुलुकमा जनताको चाहाना अनुसार जनअभिमत प्राप्त हुने र सोहि अभिमतलाई शिरोधार्य गरि सपथ लिई सदैव बिना मोलमोलाइ जनहितमा समर्पित हुनु नै राजनैतिक धर्म हो । राजनीति न त पेशा हो न त जागिर नै । यो त विशुद्ध सामाजिक सेवा हो । त्यसैले सच्चा राजनैतिक कर्मीले सदैव जनहितमा समर्पित हुनु पर्छ । अत: राजनैतिक कर्मीले सदैव आ-आफ्नो निष्ठा, सिद्दान्त र आश्थामा रहेर समाज रूपान्तरणमा लाग्नु पर्छ ।

चुनावी मुखमा सबै राजनैतिक दल आवद्द नेताले हतार हतार उद्घाटन र सिलान्यासमा देखाएको चासोले ति दल प्रतिको आश्थालाई घटाएको छ । आम जनताले यस्ता नाटकीय क्रियाकलापलाई समेत बुझ्नुपर्छ । र भोलिका दिनमा हुने चुनावमा सहि निर्णय लिई उदण्ड राजनैतिक दललाई पाखा लगाई दण्डित गर्नु पर्छ । नागरिकले आफ्नो मत अधिकारको बिबेक पूर्ण चयन गरेमा मात्र राजनैतिक दललाई सहि बाटोमा लैजान सकिन्छ ।

प्रकाशित मिति: बिहीबार, चैत १७, २०७८ १३:४८

प्रतिक्रिया दिनुहोस्