अमेरिकालाई एमसिसी पारित गर्ने लिखितपत्र लेखेर प्रचण्डले जनतालाई झुक्याएको ओलीको आरोप

राजनीति

Home
राजनीति
अमेरिकालाई एमसिसी पारित गर्ने लिखितपत्र लेखेर प्रचण्डले जनतालाई झुक्याएको ओलीको आरोप

अमेरिकालाई एमसिसी पारित गर्ने लिखितपत्र लेखेर प्रचण्डले जनतालाई झुक्याएको ओलीको आरोप

फाइल तस्वीर

काठमाडौँ । एमाले अध्यक्ष केपी ओलीले सभामुख अग्नि सापकोटाले एमसिसी अगाडि नबढाएको भन्दै असन्तुष्टि पोख्नुभएको छ । वर्तमान गठबन्धन सरकार सभामुख सापकोटाका सामु निरीह बनेको ओलीको आरोप छ । सरकारले संसद् सचिवालयमा दर्ता गरेको एमसिसी सम्झौतासम्बन्धी कार्यसूचीलाई सभामुख सापकोटाले छलफलका लागि रोकेर अनधिकृत गरेको ओलीको आरोप छ ।

पूर्वसभामुख कृष्णबहादुर महरा र हालका सभामुख सापकोटको भूमिकाप्रति ओलीको असन्तुष्टि छ । ‘सरकारले निर्णयार्थ पेस गर्नका लागि संसद्मा दर्ता गरेको विषयलाई रोक्छु भन्ने अधिकार सभामुखलाई छैन, त्यो सभामुखको कर्तव्य पनि होइन । तैपनि उनले अनधिकृत ढंगले बलमिच्याइँ गरेका छन् । यो गठबन्धनको निरीहता, पदलोलुपता र जसरी पनि गठबन्धन कायम राख्नुपर्छ र सरकारमा बस्नुपर्छ भन्ने कुरा हो,’ शुक्रबार पार्टीको प्रशिक्षण उद्घाटन गर्दै ओलीले भन्नुभयो, ‘अघिल्लो सभामुखले अनधिकृत क्रियाकलाप गरेका हुन्, अहिलेका सभामुखले पनि त्यही अनधिकृत क्रियाकलाप जारी राखेका छन् । त्यस्तो अनधिकृत क्रियाकलाप गर्ने सभामुखकहाँ केही प्रशंसा गर्न पुग्छन् रे भन्ने थाहा पाउँदा अचम्म लागेको छ ।’

पुनर्स्थापित संसद् एमालेको अवरोधका कारण चल्न सकेको छैन । एमालेले गठबन्धनले आफ्नो धारणा बनाएपछि एमसिसीबारे पार्टीले निर्णय गर्ने बताएको छ । आफू प्रधानमन्त्री हुँदा एमसिसी पास गराउन प्रयास गर्नुभएका ओली अहिले स्पष्ट देखिनुभएको छैन । ओलीले सरकारले राष्ट्रलाई गम्भीर कूटनीतिक अप्ठेरोमा फसाउँदै लगेको दाबी गर्दै भूराजनीतिक अवस्थाप्रतिका खेलबाडपूर्ण गतिविधिले नेपालले चर्को दबाब सहनुपर्ने अवस्था आएको पनि बताउनुभयो ।

अमेरिकालाई एमसिसी पारित गर्ने लिखितपत्र लेखेर प्रचण्डले जनतासँग अर्कै र पार्टीभित्र अर्कै कुरा गरेर देश र जनतालाई झुक्याएको ओलीको आरोप छ । नेताहरूको यस्तो गैरजिम्मेवार चरित्रले देशलाई गम्भीर संकटमा धकेलेको ओलीको भनाइ छ । ओलीले प्रधानमन्त्री र एउटा पार्टी अध्यक्षले एमसिसीलाई पत्र लेखेको घटना प्रोटोकल र राष्ट्रिय स्वाभिमानका हिसाबले गम्भीर आपत्तिजनक भएको पनि दाबी गर्नुभयो ।

प्रकाशित मिति: शनिबार, माघ २९, २०७८ १३:३४

प्रतिक्रिया दिनुहोस्