दाङ । लमही नगरपालिका वडा नं. १ सुन्डबरी निवासी ४९ वर्षीय खिमबहादुर घर्ती माछा मार्न घर नजिककैको कुलोमा गएका थिए। श्रीमान्–श्रीमती दुबैजना माछा मार्न निस्किएका थिए।
माछा मार्दैगर्दा घर्तीले अन्धाई (अन्धो माछा) फेला पारे। सिमसारजस्तो ठाउँमा यो माछा पाइन्छ। माछा फेला पारेपछि मार्न मुखले टोके। त्यसको केही बेरमा घर्ती बेहोस हुन पुगे। उपचारको लागि लमही अस्पताल पुर्याइयो। तर, अस्पताल पुर्याउँदा पुर्याउँदै उनको बाटोमा मृत्यु भयो।
घर्तीको कसरी मृत्यु हुन पुग्यो भन्नेबारेमा पुष्टि हुन सकेको छैन। वडा प्रहरी कार्यालय लमहीका प्रहरी प्रमुख राजन पौडेलले पोष्टमार्टमपछि मात्रै मृत्यु के कारणले भएको हो त्यसबारेमा बताउन सकिने बताए।
‘माछा मार्न गएको बेलामा बेहोस भएको जानकारी आयो। माछा पनि मारेको बुझियो। तर, कसरी मृत्यु भयो यकिन भन्न सकिने अवस्था छैन,’ उनले भने, ‘कुनै विषालु सर्पले टोकेको हुनसक्छ या अन्य कारणले पनि मृत्यु भएको हुनसक्छ।’
घर्तीले मुखले टोकेर मारेको माछा विषालु नहुने माछाका जानकार भास्कर चौधरीले बताए।
‘यो माछा विषालु हुँदैन। टोक्न पनि सक्दैन,’ उनले भने, ‘माछा मार्ने क्रममा विषालु सर्पले टोकेको हुन सक्छ।’
लमही अस्पतालका निमित्त मेडिकल सुपरिटेन्डेन्ट डाक्टर रञ्जिता कुमारी महतोले घर्तीको अस्पताल ल्याउँदा मृत्यु भइसकेको बताइन्।
मृत्युबारे पोष्टमार्टमपछि मात्रै के कारणले भएको थाहा हुने उनको भनाइ छ।
