बर्दिया । जिल्लाको मधुवन नगरपालिका वडा नं.-२ रज्वारामा शनिबार राती हात्तीले घर भत्काउँदा शर्टसर्किट भएर आगलागी भएपछि घरबार बिहिन हुनुभएका पीडित दीर्घ बहादुर दमाईलाई मधुवन नगरपालिकाका नगरप्रमुख गणेशबहादुर के.सी. (कृष्ण)ले सहयोग उपलब्ध गराउनुभएको छ ।
नगरप्रमुख के.सी. (कृष्ण)ले मानविय धर्म पुरा गर्दै आफ्नो तर्फबाट ब्यक्तिगत सहयोग गर्नुभएको हो ।
उहाँले पीडित दीर्घ बहादुर दमाईका बालबालिका र परिवारलाई केही समय खान-लाउन समस्या नहोस् भन्ने उदेश्यका साथ आफ्नो तर्फबाट तत्काललाई रु १२ हजार सहयोग गर्नुभएको हो ।
सहयोग रकम हस्तान्तरण गर्दै नगरप्रमुख के.सी. (कृष्ण)ले मधुवननगर एउटा परिवार भएको र परिवारका सदस्यलाई कुनै समस्या, दु:ख:पिडा भए आफुले सँधै नगरवासीको दु:खमा साथ दिने बताउनुभयो ।
नगरप्रमुख के.सी. (कृष्ण)ले पीडित दमाईलाई भन्नुभयो, " तँपाइ र तँपाइको परिवारलाई मधुवन नगरपालिकाले सहयोग गर्छ, चिन्ता नलिनुस्, तँपाइको घर पनि हामी बनाउने छौँ । तँपाइ र तँपाइको परिवारलाई घरबार बिहिन हुन दिने छैनौँ ।"
सहयोग रकम लिँदै भावुक हुनुभएका पीडित दीर्घ बहादुर दमाईले आफ्ना आँखाभरीका आँशु पुछ्दै धन्यवाद दिनु भएको थियो ।
शनिवार राती करीब ११:३० बजेतिर फर्दङ्गा सामुदायिक वनबाट गाउँमा छिरेको हात्तीले घर भित्र भण्डारण गरी राखेको अन्न खान खोज्दा शर्टशर्किट भएपछि घर र गोठमा आगो लाग्दा भान्सा र गोठ पुरै जलेको छ भने २ वटा बाख्रा, ६ वटा कुखुरा, २ वटा साइकल, १ वटा मोटरसाइकल लगायत गहुँ, मकै, चामल पूर्ण रुपमा जलेर नष्ट भएका छन ।
पीडित दिर्घ बहादुर दमाइको परीवार अहिले घरबार बिहिन अवस्थामा पुगेको छ ।
हात्तीले घर भत्काइदिएपछि आहत हुनुभएका पीडित दमाई र उहाँको परिवारलाई खाना छिमेकीले खुवाएका छ्न । दमाई र उहाँको परिवारलाई केहि दिन खान लाउन समस्या नहोस् भनेर नगरप्रमुख के.सीले ब्यक्तिगत सहयोग गर्नुभएको हो ।
हात्ती पीडित दमाईको घर नगरपालिकाले बनाइदिने भएको छ । केहि समय यता मधुवन नगरपालिकाका विभिन्न वडाहरुमा मानव वन्यजन्तु द्वन्द बढि रहेको अवस्था छ । वन्यजन्तुले गाउँ पसेर अन्नबाली खाने, घर भत्काउने गरेका छन ।
त्यस्ता घटनाबाट पीडित गरीब-दुखी विपन्नलाई नगरप्रमुख केसीले निरन्तर ब्यक्तिगत सहयोग गर्दै आइरहनुभएको छ भने संस्थागत रुपमा मधुवन नगरपालिकाको तर्फबाट छुट्टै राहत सहयोग उपलब्ध गराइरहनुभएको छ ।
