देशका विभिन्न जिल्लामा कर्फ्यु र निषेधाज्ञा, सिरहामा एक जनाको मृत्यु

देश

Home
देश
देशका विभिन्न जिल्लामा कर्फ्यु र निषेधाज्ञा, सिरहामा एक जनाको मृत्यु

देशका विभिन्न जिल्लामा कर्फ्यु र निषेधाज्ञा, सिरहामा एक जनाको मृत्यु

काठमाडौं । सुनसरीको देवानगञ्ज–कप्तानगञ्जमा भएको हिंसात्मक घटनापछि मधेसका विभिन्न जिल्लामा सुरक्षा सतर्कता बढाइएको छ। सुनसरी, धनुषा र सिरहाका संवेदनशील क्षेत्रमा कर्फ्यु आदेश जारी गरिएको छ भने पर्साको वीरगन्जमा निषेधाज्ञा लागू गरिएको छ।

सुनसरीमा यसअघि जारी कर्फ्युलाई देवानगञ्ज, महेन्द्र राजमार्ग आसपास र इनरुवा बजार क्षेत्रमा विस्तार गरिएको छ। यस्तै, जनकपुरमा प्रदर्शन चर्किएपछि जिल्ला प्रशासन कार्यालय धनुषाले जनकपुर उपमहानगरपालिकाका विभिन्न क्षेत्रसहित लक्ष्मीनिया गाउँपालिका र नगराइन नगरपालिकाका केही भागमा अनिश्चितकालीन कर्फ्यु आदेश जारी गरेको छ।

सिरहाको लहान, गोलबजार र चोहर्वा क्षेत्रमा पनि कर्फ्यु लागू गरिएको प्रशासनले जनाएको छ। यसैबीच, गोलबजारमा भएको झडपका क्रममा गोली लागेर करिब १९ वर्षीय गणेश यादवको मृत्यु भएको स्थानीय जनप्रतिनिधिले बताएका छन्। घटनामा अर्का एक युवक घाइते भएका छन् र उनलाई थप उपचारका लागि धरान पठाइएको छ।

यता, सम्भावित प्रदर्शनलाई मध्यनजर गर्दै पर्साको वीरगन्जमा बिहीबार साँझदेखि शुक्रबार बिहानसम्म निषेधाज्ञा जारी गरिएको छ। प्रशासनले तोकिएका क्षेत्रमा पाँच जनाभन्दा बढी भेला हुन, सभा, जुलुस तथा प्रदर्शन गर्न रोक लगाएको जनाएको छ।

प्रकाशित मिति: बिहीबार, साउन १४, २०८३ १८:५६

प्रतिक्रिया दिनुहोस्