दिपक मल्ल, बाँके । यातायात व्यवस्था कार्यालय बाँकेमा सवारी चालक अनुमति पत्र (लाइसेन्स) परीक्षाको नतिजा फेरबदल गर्ने गरेको आरोप लागेको छ । त्यहाँका केही कर्मचारीहरूले लाइसेन्स परीक्षामा पास भएकालाई फेल र फेल भएकालाई पास गराएको तथा परीक्षामा सहभागी नै नभएकालाई पनि पास गराएको केही व्यक्तिहरूको आरोप छ ।
उनीहरूका अनुसार ड्राइभिङ सेन्टरका दलाल र केही कर्मचारीहरूले त्यस्तो काम गर्दछन् । ट्राफिक प्रहरी तथा यातायात कर्मचारीले पास भनेर पठाएकाहरू फेल भएको घटनाहरू धेरै भएतापनी त्यस्ता घटनाहरू त्यसै दबेरै जाने गर्दछ । यो त सामान्य घटना भयो अब जुन हामी तपाइहरूलाई भन्दै छौँ त्यो त अचम्म होइन दिनमै रात पर्या जस्तै झस्किनुहुनेछ । यदि मोटरसाइकलको लाइसेन्स चाहिएमा १५ हजार रेट छ भने चार पांग्रेको ३०-३५ हजार । त्यसैले नेपाल सरकारले यो ट्रायलको नाटक गरेर पैसै कमाउनु छ भने नागरिकता दिएजस्तै १५-३० को हिसाबले सबैलाई विभिन्न अफरको नाममा दिए भैगो नि । हत्या गर्ने लाइसेन्स बाँड्दै दलाल र कर्मचारीको सङ्गठित अपराधीकी नेक्सस (सञ्जाल) । यो सञ्जाललाई हामीले हत्यारा किन भनेको भने यिनीहरूले दिएको यस्ता लाइसेन्सकै कारण बाँकेमा ईदी मनाएर आउँदा दुई बच्चाको ज्यान गएको याद ताजै छ, तसर्थ यस्ता पापीहरूको संरक्षण गर्ने ती माथिका नेक्ससमा रहेका शासक, प्रशासक तथा नेताहरूले केही व्यक्तिहरूलाई लगातार करिब ५-८ वर्ष हुँदा समेत सरुवा पत्र निस्केको छैन । होइन त अचम्म लाग्ने कुरो ? ती कर्मचारीका नाम हामी सबुत सहित प्रकाशित गर्नेछौँ, हो हात्तीका देखाउने दाँत र बचाउने दाँत फरक भने जस्तै जनता झुक्क्याउन र देखाउन २-३ महिना सरुवाको नाटक भएको छ भने कसैको १ वर्ष सरुवा गराएको देखाएर पुन बाँके धाम मै ल्याइएको छ ।
यस्ता घटनाहरू धेरै भएका छन्, पढ्नुहोस् यस्ता घटनाको नालीबेली...
०४ चैत्र २०७८ मा अख्तियार दुरुपयोग अनुसन्धान आयोगले ९ कर्मचारीविरुद्ध विशेष अदालतमा अचम्मको मुद्दा दायर गर्यो यातायातमा फेललाई पास, पासलाई फेल
अख्तियार दुरुपयोग अनुसन्धान आयोगले सवारी चालक अनुमति पत्र (लाइसेन्स) परीक्षाको नतिजा फेरबदल गरेको अभियोगमा ९ कर्मचारीविरुद्ध विशेष अदालतमा मुद्दा दायर गरेको थियो । उनीहरूले लाइसेन्स परीक्षामा पास भएकालाई फेल र फेल भएकालाई पास गराएको तथा परीक्षामा सहभागी नै नभएकालाई पनि पास गराएको अख्तियारको आरोप थियो ।
अख्तियारले यातायात व्यवस्था कार्यालय पोखराका तत्कालीन निमित्त कार्यालय प्रमुख गोकुल शर्मा पौडेल र शाखा अधिकृत हरिप्रसाद गौतमसहित ९ जनाविरुद्ध मुद्दा दायर गरेको थियो ।
२०७५ साल मङ्सिर र २०७६ साल साउनदेखि मङ्सिर महिनामा सञ्चालन गरिएको सवारी चालक अनुमति पत्रको परीक्षामा उनीहरूले अनियमितता गरेका थिए । त्यति बेला १ सय ६८ जना परीक्षार्थीको नतिजा फेरबदल गरिएको थियो ।
अख्तियारका तत्कालीन प्रवक्ता श्यामप्रसाद भण्डारीले सवारी चालक अनुमति पत्रको परीक्षाको परिणाम फेरबदल गरी भ्रष्टाचार गरेको आरोपमा उनीहरूविरुद्ध विशेष अदालतमा मुद्दा दायर गरिएको जानकारी नेपाल कागजलाई दिएका थिए । यातायात व्यवस्था कार्यालयका तत्कालीन शाखा अधिकृत हरिप्रसाद गौतम, अधिकृत स्तर आठौँ भरतराज काफ्ले, अधिकृत स्तर सातौँ प्रेमप्रसाद श्रेष्ठ, अधिकृत स्तर छैटौँ डिल्लीराम बराल, कम्प्युटर अधिकृत छैटौँ होमनाथ शर्मा, कम्प्युटर अपरेटर (करार) झलक पौडेल, कम्प्युटर अपरेटर (करार) मोहनमणि सुवेदी र अधिकृत स्तर आठौँ भरतमणि बराल यो काण्डका मुख्य हिरो र साइड हिरो थिए ।
