खुकुरी हानेर फरार आकाशजंगलाई बाँके प्रहरीले हान्यो गोली : ३ गोली फायर, १ गोली लाग्यो

सुरक्षा/अपराध

Home
सुरक्षा/अपराध
खुकुरी हानेर फरार आकाशजंगलाई बाँके प्रहरीले हान्यो गोली : ३ गोली फायर, १ गोली लाग्यो

खुकुरी हानेर फरार आकाशजंगलाई बाँके प्रहरीले हान्यो गोली : ३ गोली फायर, १ गोली लाग्यो

बाँके । खुकुरी हानेर फरार भएका अभियुक्तलाई पक्राउ गर्न बाँके प्रहरीले तीन राउन्ड गोली चलाएको छ । बैजनाथ गाउँपालिका घर भई हाल कोहलपुर नगरपालिका– ११ बस्दै आएका आकाशजंग रानाले कोहलपुर नगरपालिका– १२ चप्परगौडीका २९ वर्षीय मीनबहादुर विकलाई धारिलो हतियार(खुकुरी) प्रहार गरी फरार भएका थिए ।

खुकुरी प्रहारबाट गम्भीर घाइते विकलाई नेपालगन्ज मेडिकल कलेज शिक्षण अस्पताल कोहलपुरमा उपचार पछि थप उपचारका लागि भारतको लखनउ लगिएको छ ।

जानकी गाउँपालिका– ४ मा लुकीछिपी बसेको भन्ने गोप्य सूचनाका आधारमा पुगेको प्रहरीलाई देख्नेबित्तिकै भाग्न खोज्दा उनीमाथि तीन राउन्ड गोली प्रहार गरिएको बाँके प्रहरी प्रवक्ता डिएसपी नारायण डाँगीले बताउनुभयो ।

तीन राउन्ड गोलीमध्ये एउटा गोली रानाको दायाँ खुट्टाको तिघ्रामा लागेको डाँगीले बताउनुभयो ।

डिएसपी डाँगीका अनुसार पक्राउ परेका रानासहितको समूहले ३० कात्तिक बिहान विकलाई खुकुरी प्रहार गरी गम्भीर घाइते बनाएको थियो । लागुऔषध मुद्दामा पाँच वर्ष जेल बसेका रानाले २८ कात्तिकमा कोहलपुर नगरपालिका– ११ मा एक महिलालाई बलात्कार प्रयास गरेको उजुरीसमेत परेको बताइएको छ ।

डिएसपी डाँगी त्यही अधिकारी हुनुहुन्छ जसले प्रहरी निरीक्षक भएर वडा प्रहरी कार्यालय बाँकेमा रहँदा गुण्डा र तस्करविरुद्ध अभियान चलाउनुभएको थियो ।

उहाँ डिएसपी भएर बाँकेमा आएपछि गुण्डागर्दी निर्मुल पार्नका लागि लागिपरेको जिल्ला प्रहरी कार्यालय बाँकेका हाम्रा स्रोतले बताउनुभयो ।

प्रकाशित मिति: आइतबार, मंसिर ३, २०८० १०:१७

प्रतिक्रिया दिनुहोस्