बर्दिया । बर्दिया सदरमुकाम गुलरीयामा आज बुधवार जनताको सुरक्षार्थ व्यापक सुरक्षाकर्मी परिचालन गरेर दुर्गा माताको मूर्ति विर्सजन गरिएको छ ।
नेपाल प्रहरी बर्दिया, सशस्त्र प्रहरी बर्दिया, राष्ट्रिय अनुसन्धान बिभाग लगायत ट्राफिक प्रहरी व्यापक मात्रामा परिचालन गरेर अत्यन्तै शान्त तवरमा माताको मुर्ति बिसर्जन गरियो ।
केही समय अघि बर्दियाको छिमेकी जिल्ला बाँकेमा दुई समुदायबीच विवाद उत्पन भई साम्प्रदायिक दङ्गा भड्किएको थियो । तसर्थ आज विशेष सुरक्षा व्यवस्था अपनाएर मुर्ति विसर्जन गरिएको जिल्ला प्रशासन कार्यालय बर्दियाले जानकारी दियो ।
यसवर्ष बर्दियामा करीब ६५ देखि ७० ठाउँमा दुर्गा माताको मूर्ति बनाएर पूजा आयोजना गरिएको थियो ।
दुर्गाभवानीको मूर्ति (प्रतिमा) विसर्जनलाई शान्तिपूर्ण रुपमा सम्पन्न गराउन जिल्ला प्रशासन कार्यालय बाँके र बर्दियाले सुरक्षा व्यवस्था कडा बनाएको छ ।
मूर्ति विसर्जनलाई सभ्य बनाउन नेपालगन्जको सुरक्षाव्यवस्थालाई कडा पारिएको र त्यसका लागि जिल्लामा करिब एक हजार पाँच सय सुरक्षाकर्मी परिचालन गरिएको बाँकेका प्रमुख जिल्ला अधिकारी श्रवणकुमार पोखरेलले बताउनुभयो ।
उहाँले सुरक्षाका दृष्टिकोणले संवेदनशील मानिएका ३१ स्थानमा केन्द्रित गरेर बढी सतर्कता अपनाइएको बताउनुभयो । ती स्थानमा १२ घण्टा अघिदेखि नै सुरक्षाकर्मी परिचालन गरेर निगरानी बढाइएको छ । सुरक्षालाई थप चुस्त दुरुस्त बनाउन नेपाल भारत नाकामा पनि विशेष सतर्कता अपनाइएको छ ।
बर्दिया र बाँकेमा भारतबाट आउने भारतीय परिचयपत्र भएका नागरिकलाई आवश्यक काम बाहेक आज एक दिनका लागि आउन कडाइ गरिएको छ ।
बाँके जिल्लाको सुरक्षा व्यवस्था चुस्त पार्नका लागि नेपाल प्रहरी र सशस्त्रप्रहरीको एकएक वटा कमान्ड पोस्ट स्थापना गरिएको छ ।
नेपालप्रहरीको १६ वटा मोबाइल टोलीद्वारा २४ सै घण्टा गस्ती गरिने व्यवस्था गरिएको छ । दुई जना प्रहरी निरीक्षकको कमान्डमा स्कर्टिङ ड्युटी परिचालन गरिएको र आकस्मिक उद्धार र मद्दतका लागि १० वटा क्विक रेस्पोन्स समूह तयारी अवस्थामा राखिएको प्रजिअ पोखरेलले बताउनुभयो ।
सुरक्षाअवस्थालाई दृष्टिगत गर्दै जिल्लामा नागरिकलाई सुरक्षा प्रदान गर्न नेपाल प्रहरीका एक हजार १३ जना र सशस्त्रप्रहरीका ४९५ जना गरी कुल एक हजार ५०८ सुरक्षाकर्मी प्रत्यक्ष रूपमा परिचालन गरिएको जिल्लासुरक्षा समिति बाँकेले जनाएको छ । अहिले मूर्ति विसर्जन गरी यहाँको राप्ती नदीतर्फ सेलाउनका लागि लगिएको छ भने बर्दियामा भादा नदीमा सेलाउन लगिएको छ ।