नेपालगञ्ज (बाँके) । नेपालगञ्जमा एक सातादेखि जारी कर्फ्यू हटाइएको छ । जनजीवन सामान्य हुँदै गएपछि कर्फ्यू हटाइएको जिल्ला प्रशासन कार्यालयका सहायक प्रमुख जिल्ला अधिकारी टोपेन्द्रबहादुर केसीले जानकारी दिनुभयो । उहाँले शान्तिसुरक्षाको अवस्था सामान्य बनेकाले कर्फ्यू हटाइएको उल्लेख गर्नुभयो ।
अघिल्लो मङ्गलबार नेपालगञ्जमा तनाव उत्पन्न भएपछि दिउँसो १ बजेदेखि कर्फ्यू आदेश जारी गरिएको थियो । अवस्था सामान्य बन्दै गएपछि केही दिनयता दिउँसोको समयमा निषेधाज्ञा र राति कर्फ्यू लाग्दै आएको थियो ।
सामाजिक सञ्जालमा लेखिएको विषयलाई लिएर उत्पन्न विवादका कारण परिस्थिति असहज बन्ने देखिएपछि असोज १६ गते मङ्गलबार दिउँसो १ बजेदेखि नेपालगञ्जमा अनिश्चितकालीन कफ्र्यू लगाइएको थियो ।
तर बाँके प्रहरी प्रमुख, सिडियो, सशस्त्र नेतृत्व, पत्रकार, बुद्धिजीवी तथा धार्मिक गुरूहरूको सुझबुझले अहिले बाँके सामान्य अव्यवस्थामा फर्किएको छ । यही असोज १८ गतेदेखि दिउँसोको कर्फ्यू हटाइएको थियो भने रातिकाे समयमा कर्फ्यू कायमै राखिएको थियो ।
बाँकेमा प्रहरीले दसैं र तिहार पर्वका लागि विशेष सुरक्षा योजना ल्याएको छ । जिल्ला प्रहरी कार्यालय, बाँकेले कोहलपुर नगरपालिकास्थित बसपार्क र नेपालगञ्ज बसपार्कमा यात्रु सहायता कक्ष स्थापना गरेको जिल्ला प्रहरी कार्यालय बाँकेका प्रमुख प्रहरी उपरीक्षक सन्तोष सिंह राठौरले जानकारी दिनुभयो । चाडपर्व नजिँकिंदै गर्दा बाँके प्रहरी हाई अलर्टमा छ ।
जिल्ला प्रहरी कार्यालय बाँकेका प्रमुख प्रहरी उपरीक्षक (एसपी) सुपरिटेन्डेन्ट अफ पोलिस राठौरले भन्नुभयो, "सीमा क्षेत्र जमुनाह नाकामा समेत भारतबाट आउने नेपाली नागरिकको सहजीकरणका लागि यात्रु सहायकता कक्ष स्थापना भएको छ ।"
यता भारतबाट आएका केहीले गरेको गुनासो सम्बोधन गरिएको जमुनाहका वरिष्ठ प्रहरी नायब निरीक्षक मिनबहादुर विष्टले जानकारी दिनुभयो ।
प्रहरीले बसपार्क क्षेत्रमा यात्रुहरु ठगी हुने सम्भावना भएकाले त्यसमा पनि निगरानी बढाएको जानकारी दिँदै प्रहरी उपरीक्षक राठौरले भारतका रेल्वेस्टेसनसम्म पनि सादा पोसाकमा रहेका प्रहरीले निगरानी गरेको बताउनुभयो ।
संगठनमा ईमान्दार प्रहरी अधिकारीको रुपमा चिनिने राठौरले नागरिककोे जीउधनको सुरक्षा गर्ने प्रहरीको कर्तव्य र कर्म भएकोले ठाउँठाउँमा सादा पोशाकमा प्रहरी परिचालन गरिएको बताउनुभयो ।
उहाँले भन्नुभयो, "जनताको सेवा नै मेरो लक्ष्य हो, अपराध मुक्त समाज बनाउन म पछि हट्दैन । जनताको सुरक्षामा कुनै कम्प्रोमाइज हुँदैन "