भेरी अस्पतालमा चार जनाको मृत्यु निसास्सिएर भएको आशंका, घटनाको वास्तविकता शव परीक्षण रिपोर्ट पछि

देश

Home
देश
भेरी अस्पतालमा चार जनाको मृत्यु निसास्सिएर भएको आशंका, घटनाको वास्तविकता शव परीक्षण रिपोर्ट पछि

भेरी अस्पतालमा चार जनाको मृत्यु निसास्सिएर भएको आशंका, घटनाको वास्तविकता शव परीक्षण रिपोर्ट पछि

बाँके । नेपालगञ्जस्थित भेरी अस्पतालको कर्मचारी आवास गृहमा चार जना मृत अवस्थामा फेला परेका छन भने तीन जना बेहोस अवस्थामा भेटिएका छन । तीन जनाको उपचार भइरहेको छ । अस्पतालको स्टोर शाखामा कार्यरत धनप्रसाद भट्टराईसहित उनका परिवार र आफन्तको मृत्यु भएको बाँकेका प्रहरी उपरीक्षक श्यामकृष्ण अधिकारीले जानकारी दिनुभयो । उहाँका अनुसार मृत्युहुनेमा धनप्रसाद सहित उहाँकी बहिनी अन्दाजी २२ वर्षीया कोली, तीन महिनाका छोरा इप्सन भट्टराई र सासू अन्दाजी ५५ वर्षीया कोपिला छन् ।

खाँडाचक्र नगरपालिका–६ कालीकोट निवासी उनीहरु एउटै कोठामा सुतेका बताइएको छ । चिसोमा कोइला बालेर सुतेका कारण निसास्सिएर मृत्यु भएको हुनसक्ने प्रहरीको अनुमान छ । चार जनाको मृत्यु भएपनि अन्य तीन जना अचेत अवस्थामा फेला परेका थिए । ती मध्ये एक जनाको होस खुलेपनि दुई जना अझै अचेत अवस्थामै रहेको प्रहरी उपरीक्षक अधिकारीले जानकारी दिनुभयो ।

तीन जनाको भेरी अस्पतालमा उपचार भइरहेको छ । आज बिहान करिब ६ बजेतिर कोठामा गएर अन्य कर्मचारीले हेर्दा चार जना मृतास्थामा फेला परेका थिए । धनप्रसाद सहित उक्त निवासमा सात जना थिए ।

घटनाबारे जानकारी पाउनासाथ प्रमुख जिल्ला अधिकारी सूर्यबहादुर खत्री र प्रहरी उपरीक्षक अधिकारीको टोली घटनास्थल पुगेको थियो । प्रजिअ खत्रीले घटनास्थल हेर्दा निसास्सिएर मृत्यु भएको आशंका गरिएपनि विस्तृत कुरा शव परीक्षण रिपोर्टले बताउने जानकारी दिनुभयो ।

प्रकाशित मिति: बिहीबार, पुस १५, २०७८ १२:०२

प्रतिक्रिया दिनुहोस्