नेपालगन्ज : बाँकेमा ठूलो धनराशि सहितको डान्स प्रतियोगिता हुनेभएको छ। नेपालगन्जमा मंगलबार आयोजक टिमले प्रेसमिट गर्दै प्रतियोगिताको बारेमा औपचारिक जानकारी दिएको हो।
आयोजक टिमका अनुसार रोयल डान्स प्रालिको आयोजनामा "डान्स बाँके डान्स" प्रतियोगिता सम्पन्न हुनेछ। प्रतियोगिताको फाइनल आगामी पौष ३ गते भव्य कार्यक्रमको माझ सम्पन्न हुने भएपनि अडिसन भने यही कार्तिक २४ गतेदेखि सुरुहुने जनाइएको छ।
पश्चिम क्षेत्रमा लुकेर रहेका डान्सरहरुको क्षमता प्रस्फुटन गर्ने उद्देश्यले प्रतियोगिताको आयोजना गर्न लागेको आयोजक टिमले बताएको छ। सम्भवतः यो प्रतियोगिता नेपालगन्जमै अहिले सम्मकै बढी राशि भएको प्रतियोगिता रहेको आयोजक टिमको भनाइ छ।
प्रतियोगितामा ५ वर्ष माथिका जोकोहीले भाग लिन पाउने बताइएको छ। कोहलपुर, राजापुर गुलरिया धनगढी, दाङ र नेपालगन्जमा अडिसन लिने आयोजकको योजना छ।
पछिल्लो समय नेपालमा भइरहेका रियालिटी शोको फर्म्याटमा जस्तै यो प्रतियोगितामा पनि "वाइल्ड कार्ड इन्ट्री" व्यवस्था रहेको आयोजक टिमका सदस्य रोहित थापाले बताए।
प्रतियोगितामा प्रथम हुनेलाई ५० हजार, आकर्षक गिफ्ट र म्युजिक भिडियो, द्वितीय हुनेलाई २५ हजार , आकर्षक गिफ्ट र म्युजिक भिडियो, तृतीय हुनेलाई १५ हजार र आकर्षक गिफ्ट र चौथो हुनेलाई ७ हजार र आकर्षक गिफ्ट पुरस्कार दिइनेछ।
साथै, प्रतियोगितामा बेस्ट डान्सर पुरस्कारको व्यवस्था समेत गरिएको छ। बेस्ट डान्सरले नगद ३ हजार रुपैयाँ सहित आकर्षक पुरस्कार प्राप्त गर्नेछन् । फाइनलमा लोकप्रिय नायक दिलिप रायमाझी, डान्सर आश्मा बिश्वकर्मा, डान्सर सुजन मार्पा, डान्सर सियोन श्रेष्ठ लगायतका कलाकारको उपस्थिति रहने पनि बताइएको छ।
