बुटवल । कोरोना संक्रमित बोक्ने एम्बुलेन्स अभाव भएपछि रूपन्देहीका तीन स्थानीय तहका जनप्रतिनिधिले आफू चढ्ने गाडी एम्बुलेन्सका रूपमा प्रयोग गर्न उपलब्ध गराएका छन्। तिलोत्तमा नगरपालिका, सिद्धार्थनगर नगरपालिका र सियारी गाउँपालिकाका सवारी साधनलाई एम्बुलेन्सका रूपमा प्रयोग गर्न थालिएको हो।
सियारी गाउँपालिका अध्यक्ष अयोध्या थारू र उपाध्यक्ष अमृता गुरुङले दुई स्कार्पियोलाई बिरामी बोक्ने बनाएका छन्। बिरामीले एम्बुलेन्स नपाएर मर्नुपर्ने अवस्था हुनुहुँदैन भनेर गाडी बिरामी बोक्न उपलब्ध गराइएको हो ।
तिलोत्तमा नगरपालिकाका नगर प्रमुख वासुदेव घिमिरे र उपप्रमुख जागेश्वरी चौधरीले चढ्दै आएका गाडी कोरोना संक्रमित बोक्न प्रयोगमा ल्याएका छन् । छिटोछरितो रूपमा सेवा दिन आफू चढेको गाडी कोरोना संक्रमितका लागि प्रयोगमा ल्याइएको नगर प्रमुख घिमिरेले बताए। संक्रमितलाई अन्य साना सवारीसाधनले सजिलै अस्पताल वा आइसोलेसनमा नपुर्याउँदा समस्या बढ्दै गएको पाइएकाले यो निर्णय गरिएको नगर प्रमुख र उपप्रमुखको भनाइ छ।
नगर प्रमुख चढ्ने लु.१ झ ३६० र उपप्रमुख चढ्ने लु.१झ ३२६ नम्बरको स्कार्पियो कोरोना संक्रमितलाई बोक्न प्रयोगमा ल्याइएको छ। यस्तै नगर प्रहरीले प्रयोग गर्ने लु.१झ ४७२ पनि कोरोना व्यवस्थापनमै प्रयोग हुनेछ। यी सवारी साधनलाई समेत २४ सैं घण्टा सेवा प्रवाहमा प्रयोग गरिने स्वास्थ्य शाखाले जनाएको छ।
सिद्धार्थनगर नगरपालिकाका प्रमुख हरिप्रसाद अधिकारीले आफू चढ्ने गाडीलाई एम्बुलेन्सका रूपमा प्रयोग गरेका छन्। बिरामीको सहजताका लागि आफ्नो गाडीलाई बिरामी बोक्न प्रयोग गरेको अधिकारीले बताए।
रुपन्देहीमा व्यक्तिगत गाडीलाई पनि निःशुल्क बिरामी सेवामा प्रयोग गरिएको छ। सिद्धार्थनगर उद्योग वाणिज्य संघका उपाध्यक्ष नेत्र आचार्य र कार्यसमिति सदस्य मंगल भण्डारीले निजी गाडीलाई एम्बुलेन्सका रूपमा प्रयोग गरेका छन्।
नवलपरासी पूर्वमा केही दिनअघि एम्बुलेन्स नपाउँदा ट्र्याक्टरमा बिरामी बोकिएको थियो। ती बिरामीको ट्र्याक्टरमै मृत्यु भएपछि स्थानीयले देवचुली नगरपालिकाका जनप्रतिनिधिप्रति आक्रोश व्यक्त गरेका थिए।