जनप्रतिनिधिले समेत प्रशासकीय अधिकृत रोशन अधिकारीविरुद्ध किटानी जाहेरी दिए
मार्मा । मार्मा गाउँपालिकाका प्रमुख प्रशासकीय अधिकृत रोशन अधिकारीलाई आगजनीमा संग्लन रहेको भन्दै प्रहरीले पक्राउ गरेको छ। प्रहरीले उनलाई सदरमुकाम खलंगाबाटै पक्राउ गरेको हो।
फागुन २४ राति आगजनी र ढुंगामुढा भएको भन्दै उनले २५ फागुनमा इलाका प्रहरी कार्यालय लटिनाथमा जानकारी गराएका थिए।
प्रहरीको अनुसन्धानको क्रममा प्रमुख प्रशासकीय अधिकृत आफैँले आगजनी गरेको प्रमाण फेला परेपछि उनलाई पक्राउ गरिएको जिल्ला प्रहरी कार्यालय दार्चुलाका सूचना अधिकारी एवं प्रहरी निरीक्षक ज्ञानेन्द्रबहादुर सिंहले जानकारी दिए।
अधिकारीविरुद्ध सोमबार जिल्ला अदालतबाट सात दिनको म्याद थप गरी अनुसन्धान थालिएको छ। उनीविरुद्ध आपराधिक उपद्रव गर्न नहुने मुद्दामा अनुसन्धान थालिएको प्रहरीले जनाएको छ।
आगजनीको घटनालगत्तै निजामती कर्मचारी संगठन र कतिपय सरोकारवालाले तत्काल छानबिन र दोषीमाथि कारबाहीको माग गर्दै विज्ञप्ति निकालेका थिए। कर्मचारी संगठनका जिल्लास्तरीय समितिका साथै केन्द्रीय समितिले समेत घटनाबारे चासो देखाएका थिए।
स्थानीय तहको प्रमुख प्रशासकीय अधिकृतमाथिको घटनालाई सबैतिर गम्भीर रूपमा हेरिएपछि सुदूरपश्चिमका वरिष्ठ प्रहरी उपरीक्षक दिल्लीराज विष्ट नेतृत्वको टोलीले फागुन २६ गते मार्मा गाउँपालिका केन्द्र लटिनाथ पुगेर स्थलगत निरीक्षणसमेत गरेका थिए।
यस्तै, घटनालगत्तै जिल्ला प्रहरी कार्यालय दार्चुलाका प्रहरी निरीक्षक गोविन्द भण्डारी नेतृत्वको टोली अनुसन्धानमा खटिएको थियो। निरन्तरको अनुसन्धानपछि प्रशासकीय अधिकृत आफैँ संग्लन रहेको देखिएको प्रहरी अधिकारी बताउँछन्।
गोरखा जिल्ला गण्डकी गाउँपालिका– १ घर भई हाल काठमाडौं जिल्लाको नागार्जुन नगरपालिका– १ रानीवनमा बसोवास गर्दै आएका अधिकारी ०८० भदौदेखि मार्मा गाउँपालिकाको प्रमुख प्रशासकीय अधिकृतको जिम्मेवारीमा थिए। २७ वर्षीय अधिकारीले घटना आफैँले किने गरे भन्नेबारे प्रहरीले खुलाएको छैन।
आगजनीको सन्दर्भमा स्थानीय तहकै जनप्रतिनिधिले समेत अधिकारीविरुद्ध किटानी जाहेरी दिएका थिए।
