असइ थमनको हत्या गर्ने संसदीय दल नेता पूर्वमन्त्री अभिरामको सेवा–सुविधा रोक्का

अपराध

Home
अपराध
असइ थमनको हत्या गर्ने संसदीय दल नेता पूर्वमन्त्री अभिरामको सेवा–सुविधा रोक्का

असइ थमनको हत्या गर्ने संसदीय दल नेता पूर्वमन्त्री अभिरामको सेवा–सुविधा रोक्का सेवा–सुविधा रोकिए पनि सांसद पदबाट अझैसम्म निलम्बनमा भएका छैनन् 

नेपालकागज बिहीबार, माघ २५, २०८०

महोत्तरी । लोसपाको मधेश प्रदेश सभा संसदीय दलका नेता तथा पूर्वसामाजिक विकास राज्यमन्त्री अभिराम शर्माको सेवा–सुविधा रोक्का भएको छ ।सशस्त्र प्रहरी बलका असइ थमन विकको हत्या मुद्दामा जन्मकैद सजाय पाएका उनको माघदेखि सेवा–सुविधा रोक्का गरिएको मधेश प्रदेश सभा सचिवालयले जनाएको छ ।

महोत्तरी जिल्ला अदालतको २८ मंसिरको इजलासले असइ विकको हत्या प्रकरणमा शर्मासहित सातजनालाई जन्मकैद फैसला सुनाएको थियो ।

प्रदेश सभा सचिवालयले १४ माघमा एक व्यक्तिले सांसद शर्माविरुद्ध अदालतले गरेको जन्मकैदको फैसलासहित सेवा–सुविधा तथा पद निलम्बनसहितको उजुरी दिइएपछि सचिवालयले उनको सेवा–सुविधा रोक्का गरेको हो । शर्माले पुस मसान्तसम्मको सेवा–सुविधा पाइसकेका छन् ।

सेवा–सुविधा रोकिए पनि सांसद पदबाट उनी अझैसम्म निलम्बनमा भएका छैनन् । अदालतबाट फैसलासहितको पत्र सचिवालयमा आएपछि वा फैसला उच्च अदालत जाने म्याद समाप्त भएपछि मात्र शर्मालाई निलम्बन गर्न सकिने प्रदेश सभामुख रामचन्द्र मण्डलले बताए । जिल्ला अदालतको फैसला आएदेखि शर्मा फरार छन् । शर्मा फरार अवस्थामा रहे पनि उनलाई लोसपाले संसदीय दलको नेताबाट हटाएको छैन ।

शर्मा महोत्तरी जिल्लाको निर्वाचन क्षेत्र नम्बर ३ अन्तर्गतको प्रदेश सभा १ बाट मधेश प्रदेशमा दोस्रोपटक प्रत्यक्ष निर्वाचित भएका हुन् । यसअघि ०७४ को निर्वाचनमा सोही क्षेत्रबाट निर्वाचित भएका शर्मा मुख्यमन्त्री लालबाबु राउतको सरकारमा प्रदेश सामाजिक विकास राज्यमन्त्रीसमेत थिए ।

प्रकाशित मिति: बिहीबार, माघ २५, २०८० ११:५०