काठमाडौँ । काभ्रेको पाँचखाल नगरपालिका– ७ शिखरपुरस्थित जंगलमा १९ वर्षीया किशोरी सामूहिक बलात्कारमा परेपछि फाँसी लगाएर झुन्डिन लागेको अवस्थामा उद्धार गरिएको छ ।
किशोरी २७ पुसको साँझ साथीसँगै इभिनिङ वाकमा घरबाहिर निस्कनुभएको थियो । साथी घर फर्किनुभयो, तर किशोरी बेलुकासम्म पनि नफर्केपछि परिवारका सदस्य खोज्न निस्केका थिए । यही क्रममा किशोरी रूखमा झुन्डिन तयार भएको अवस्थामा फेला पर्नुभयो । परिवारका सदस्यले तत्काल उद्धार गरे र प्रहरीलाई जानकारी गराए ।
प्रहरीका अनुसार उहाँ पीडित किशोरीलाई स्थानीय चार मजदुरले २७ पुसको साँझ सामूहिक बलात्कार गरेका थिए ।
जिल्ला प्रहरी कार्यालय काभ्रेका अनुसार घटनामा संलग्न उदयपुर ताप्ली– ८ का धीरज हमाल, भोजपुर षडानन्द– ८ का घनश्याम श्रेष्ठ र अन्य दुई १७ वर्षका बालक रहेका छन् । घटनामा संलग्न चारैजनालाई प्रहरीले पक्राउ गरेको छ ।
जिप्रका काभ्रेका प्रमुख एसपी भाग्यन्द्रपुरुष ढकालले घटनामा संलग्न चारैजनालाई पक्राउ गरिएको र अनुसन्धानका लागि सात दिनको म्याद थप भएको बताउनुभयो । ‘२७ पुसको साँझ किशोरी सामूहिक बलात्कारमा परेको सूचना आयो । प्रहरीले घटनाको अनुसन्धान गर्यो । यस क्रममा घटनास्थलआसपासका शंकास्पद ६० भन्दा धेरैलाई पक्राउ गरियो,’ उहाँले भन्नुभयो, ‘अन्ततः चारजना घटनामा संलग्न रहेको खुल्यो । उनीहरूलाई पक्राउ गरिएको छ । जसमध्ये दुई युवा र दुई बालक छन् । उनीहरू सोही क्षेत्रमा ज्याला–मजदुरी गर्दै आएको खुलेको छ ।’
किशोरीले सामूहिक बलात्कारको सिकार भएको प्रहरीलाई बताएपछि तत्कालै प्रहरी घटनास्थल पुग्यो । घटनामा संलग्न हुनेहरू पहिचान भएको÷नभएकोबारे प्रहरीले किशोरीलाई सोध्यो । तर, किशोरीले कसैलाई नचिनेको बताएपछि प्रहरी शंकास्पद व्यक्तिको खोजीमा जुट्यो । यही क्रममा चारजना पक्राउ परेको जिप्रका प्रमुख ढकालले बताउनुभयो ।
‘समूहिक बलात्कारमा परेपछि किशोरी आत्महत्या गर्ने मुडमा पुगेकी रहिछिन् । रूखमा झुन्डिन ठिक्क परेको अवस्थामा परिवारका सदस्यले उद्धार गरे । त्यसपछि मात्रै सामूहिक बलात्कारको पोल खुल्यो,’ उहाँले भन्नुभयो, ‘तर, घटनामा संलग्न अभियुक्त किशोरीले नचिन्ने रहिछिन् । प्रहरीले फरक ढंगले अनुसन्धान गर्यो । घटनाको चार दिनपछि चार अभियुक्तको पहिचान खुल्यो । र उनीहरू पक्राउ परे ।’
प्रहरीका अनुसार पीडित किशोरीको स्वास्थ्य अवस्था अहिले सामान्य रहेको छ । उनको मेडिकल परीक्षण भइसकेको, तर प्रतिवेदन भने प्राप्त नभएको प्रहरीको भनाइ छ ।
