मिस्टर एन्ड मिस थारूलाई रा.प्र.पा नेता विनय रावलद्वारा सम्मान र सहयोग
बर्दिया । राष्ट्रिय प्रजातन्त्र पार्टीका नेता विनय रावलले मिस्टर एण्ड मिस थारूलाई सम्मान गर्नुभएको छ । मिस्टर थारूको उपाधि जित्न सफल लाल बहादुर रत्गैया र मिस थारूको उपाधि जित्न सफल अस्मिता राजवंशीसँग नेता रावलले भेट गर्दै थारू समुदाय र थारू समुदायका कला संस्कृतिको उत्थान, संरक्षण र जगेर्ना गर्न आफू सँधै निरन्तर लागिरहने बताउनुभयो ।
रा.प्र.पा नेता रावलले ‘मिस्टर एन्ड मिस थारू २०२२’ उपाधिका विजेता लालबहादुर रत्गैया र अस्मिता राजवंशी चौधरीलाई भेटेरै सम्मान गर्नुभएको हो ।
उक्त भेटघाट तथा सम्मान कार्यक्रममा समाजसेवी नेता रावललाई "मास्टर इन बिजनेस स्टडी" गरिरहनुभएकी अस्मिता राजवंशी चौधरीले अझै अगाडिको अध्ययन गर्न कामको आवश्यकता रहेको जानकारी गराउनुभएको थियो ।
नेता रावलले मिस थारू २०२२ अस्मिता राजवंशी चौधरीलाई काम खोजेर रोजगारी दिलाउने वचन दिँदै आफ्नो अध्ययनलाई निरन्तरता दिन अनुरोध गर्नुभएको थियो ।
बर्दियाका लालबहादुर रत्गैया र अस्मिता चौधरीले रा.प्र.पा नेता रावलसँग आफूले गर्नु परेको संघर्ष र समस्याको बारेमा जानकारी गराएका थिए ।
एकदमै विपन्न परिवारबाट आएका लालबहादुर रत्गैयाले आफ्नो सङ्घर्षका कुरा गरेपछि भावुक हुनुभएका नेता रावलले लालबहादुर रत्गैयालाई सहयोग गर्ने प्रतिबद्धता व्यक्त गर्दै थारू कला, संस्कृति प्रवर्द्धनका लागि र समग्र थारू समुदायको उत्थान र समृद्धिका लागि आफूले आजकै मितिबाट काम गर्ने प्रतिवद्धता व्यक्त गर्नुभयो ।
आफ्नै व्यवसाय गरेर बस्नुभएका मिस्टर थारू रत्गैयाले संघर्ष गर्दै बाख्रा, सुँगुर तथा कुखुरा पालन गर्दै स्वरोजगार बनेको बताएपछि युवा नेता रावलले भावुक हुँदै भूमिपुत्र थारू समुदायलाई सदियौँ देखी हुँदै आएको शोषण दमन र सामन्ती प्रवित्ति प्रति दुःख व्यक्त गर्दै थारू समुदायलाई नै समेटेर "बेटर एण्ड ब्राइटर बर्दिया"को योजना बनाएको र यो अवधारणा तथा योजनालाई सफल बनाउने अभियानमा लागि पर्ने र यो अभियानमा सम्पूर्ण भूमिपुत्र थारूलाई लाग्न आग्रह गर्नुभयो ।
आयोजित सौन्दर्य प्रतियोगिता ‘मिस्टर एन्ड मिस थारू २०२२’ उपाधिका लागि देशभरबाट थारू पुरुष र महिलाहरू बिच प्रतिस्पर्धा भएको थियो । ‘मिस्टर एन्ड मिस थारु २०२२’ उपाधिका विजेता लालबहादुर रत्गैया र अस्मिता राजवंशी चौधरीले चौथो संस्करणको मिस्टर एण्ड मिस थारूको उपाधि जित्न सफल हुनुभएको हो ।
