काठमाडौँ । निर्दाेषलाई लागूऔषधमा फसाउने एसपी ऋषिराम कँडेलमाथी भएको छानबिनले व्यक्तिगत प्रतिशोधमा दुई भारतीय युवालाई लागुऔषध मुद्दामा ‘फसाएको’ निष्कर्ष निकालेको छ ।
पश्चिम नवलपरासीमा एसपी ऋषिराम कँडेल र पश्चिम नवलपरासीको पाल्हीनन्दन गाउँपालिकाका अध्यक्ष बैजुप्रसाद गुप्ताको योजनामा सुनियोजित रूपमा दुई युवकसँग लागुऔषध बरामद भएको भनेर नक्कली मुद्दा चलाइएको नेपाल प्रहरीको आन्तरिक छनबिनमा देखिएको हो ।
कसरी आयो घटाना बाहिर ?
गत २२ असारमा पश्चिम नवलपरासी प्रहरीले कबाडीको व्यापार गर्ने भारतीय युवाहरुलाई लागूऔषध सहित पक्राउ गर्यो ।
सोही दिन जिल्ला प्रहरी कार्यालय पश्चिम नवलपरासीबाट खटिएको प्रहरीले रामग्रामको पिपरहियाबाट भारतीय नागरिकद्वय ४० वर्षीय रामा गुप्ता र उनका सहयोगी जितेन्द्र पासवानलाई पक्राउ गरेको थियो ।
उनीहरूसँग दुई सय ७० सेट डाइजेपाम, नुर्फिन र फेनारगन लागुऔषध बरामद भएको प्रहरीले प्रेस रिलिजमा जनाएको थियो ।
तर,स्थानीय नागरिक अगुवा, ब्यबसायी लगायत परिवारले घटाना शंकास्पद भएको भन्दै प्रहरी प्रधान कार्यालयमा निबेदन दिएका थिए । प्रहरी प्रधान कार्यालयले सो घटनाको आन्तरिक अनुसन्धान सुरु गरेको थियो । त्यस्तै लुम्बिनी प्रदेश प्रहरी कार्यालयले समेत अनुसन्धान गरिरहेको छ ।
यता प्रहरीकै आन्तरिक छानबिनले व्यक्तिगत रिसइबीको प्रतिशोधमा प्रहरीले दुई भारतीय युवालाई लागुऔषध मुद्दामा ‘फसाएको’ निष्कर्ष निकालेको छ ।
पश्चिम नवलपरासीमा प्रहरीले सुनियोजित रूपमा दुई युवकसँग लागुऔषध बरामद भएको भनेर नक्कली मुद्दा चलाएको छानबिनबाट खुलेको हो । छानबिनको क्रममा एसपी ऋषिराम कँडेल र पश्चिम नवलपरासीको पाल्हीनन्दन गाउँपालिकाका अध्यक्ष बैजुप्रसाद गुप्ताको भूमिका शंकास्पद देखिएको छ ।
अहिले आफै फस्ने वातावरण बनेपछि एसपी कँडेल घटनालाई सामसुम पार्न पत्रकार, नेता तथा हाकिमहरुसँग घटनामा आफू संलग्न नभएको भन्दै दाबी गरिरहेका छन ।
पक्राउ परेका दुवै युवक २७ दिनदेखि प्रहरी हिरासतमा छन् । निर्दाेषलाई फसाइएको भन्दै स्थानीयले संलग्न प्रहरी अधिकारीलाई कारबाहीको माग गरेका छन् ।
प्रहरीको आन्तरिक अनुसन्धानमा सुनियोजित रूपमा उनीहरूलाई लागुऔषध मुद्दामा फसाइएको देखिएको एसपीको भुमिका 'शंकास्पद' रहेको प्रहरी प्रधान कार्यालयका एक एसएसपीले नाम नखोल्ने शर्तमा नेपाल कागजलाई बताउनुभयो ।
यता पीडितका परिवारले नक्कली मुद्दामा फसाइएको भन्दै निष्पक्ष छानबिनका लागि विभिन्न निकायमा आग्रह गरेपछि यसमा पुनः छानबिन सुरु भएको छ ।
निर्दाेषलार्ई फसाइएको उजुरीपछि प्रहरी प्रधान कार्यालयले जिल्लामा विशेष टोली पठाएर छानबिन गरिरहेको छ ।
पक्राउ परेका भारतीय नागरिक गुप्ता कवाडीको व्यापारमा आबद्ध व्यक्ति हुन् जो नेपालमा बस्दै आएका छन ।
प्रहरीको आन्तरिक छनबिनमा भारतीय नागरिक गुप्ता र पाल्हीनन्दन गाउँपालिकाका अध्यक्ष बैजुबीच विगतमा व्यावसायिक सहकार्य रहेको देखिएको छ ।
पछिल्लो समय आफूसँग व्यापार नगरे फसाइदिने धम्की रामालाई दिँदै आएको भन्ने कुरा पनि खुल्न आएको छ ।
पाल्हीनन्दन गाउँपालिकाका अध्यक्ष बैजुले एसपी ऋषिराम कँडेललाई प्रभावमा पारेर योजनाबद्ध रूपमा प्रहरी प्रयोग गरी लागुऔषध मुद्दामा फसाएको छानबिनमा खुलेको छ ।
यसरी पक्राउ गरिएको थियो ?
पछिल्लो समय एक युवकले कवाडीका सामान सस्तोमा दिने भन्दै रामालाई पटक–पटक फोन गरेका थिए । त्यसैका लागि उनी मोटरसाइकलमा रामग्राम नगरपालिकाको पिपरहिया पुगेका थिए ।
बेलुकाको समयमा लामो समय कुर्दा पनि नआएपछि उनीहरू फर्कँदै थिए, र फेरि बोलाइएको थियो । जहाँ भेट्न बोलाइएको थियो, त्यहाँ लागुऔषध राखेर तत्कालै प्रहरी बोलाएर पक्राउ गरिएको थियो । प्रहरीलाई पहिले नै तयारी अवस्थामा राखिएको थियो ।
गुप्तालाई भेट्न बोलाउने व्यक्ति रघुनाथ धोबी थिए । रघुनाथ धोबी पुर्व प्रहरी कर्मचारी हुन भने पाल्हीनन्दन गाउँपालिकाका अध्यक्ष बैजु प्रसादका हालका (दाहिने हात) सहयोगी हुन् ।
गाउँपालिकाका अध्यक्षले नै उनलाई त्यसरी त्यो काममा खटाएको र प्रहरीलाई आफ्नो प्रभावमा पारेको स्रोतको भनाइ छ ।
छानबिनमा आबद्ध एक प्रहरी अधिकारीका अनुसार गाउँपालिका अध्यक्ष गुप्ता र एसपी ऋषिराम कँडेलबीच विगतदेखि नै निकटतम सम्बन्ध रहेको छ । नाम नचाप्ने शर्तमा ती अधिकारीले भन्नुभयो, ‘उहाँ इन्स्पेक्टर हुँदा नवलपरासी बस्नुभएको रहेछ, त्यतिवेलादेखि नै दुईजनाबीच निकटता देखियो । त्यही सम्बन्धलाई दुरुपयोग गरी दुई युवकलाई लागुऔषध मुद्दामा फसाइएको छ ।
यता यो घटनामा एसपी ऋषिराम कँडेललाई बचाउन प्रहरीकै कनिष्ठ अधिकारी तथा सादा पोशाकका प्रहरेलाई बलिको बोका बनाउन सक्ने सम्भावना रहेको छ ।
एसपी बचाउन अन्यलाई कारबाही गर्ने तयारी रहेको स्रोतको आँकलन छ ।
त्यस्त एसपी, गाउँपालिका अध्यक्ष र पूर्वप्रहरी धोबीबीच पटक–पटक कुराकानीसमेत भएको अनुसन्धानमा खुलेको छ । साथै पक्राउ परेका व्यक्तिहरूको मोबाइल जाँचबाट समेत कवाडीका सामान लिन आउन आग्रह गर्दै धोबीले धेरैपटक फोन गरेकोसमेत पुष्टि भएको छ ।
गाउँपालिका अध्यक्ष र एसपी बचाउन हाल पूर्वप्रहरी धोबीलाई फरार बनाइएको स्रोत बताउँछ ।
हामीले एसपी कँडेलसँग प्रतिक्रिया माग्दा उहाँले भन्नुभयो "घटनाको विषय छनबिनको क्रममा रहेकाले म बोल्न मिल्दैन । मेरो नाम जोडिएर आएकोमा म आफै अचम्मित छु । कसैले ती ब्यक्तिहरुलाई फसाउन प्रहरीलाई प्रयोग गरेको होकी त्यो पनि त छनबिनको विषय हो । सम्पूर्ण कुरा छनबिन समितिको अनुसन्धानपछी छर्लङ्ग हुनेछ ।"
घटनाको विषयमा प्रदेश प्रहरी कार्यालयका प्रमुख डिआइजी नलप्रसाद उपाध्यायले नेपालकागजसँग भन्नुभयो, "प्रहरीको गल्ती प्रमाणित भएमा उनीहरूलाई पनि कारबाही हुन्छ । पहिला छनबिन हुन दिनुहोस । गल्ती गर्नेलाई बिभागीय कारबाही हुन्छ ।"
